Të premten, më 27 mars 2026, Qendra për Kulturë e Ulqinit u bë skenë e një ngjarjeje të veçantë kulturore. Rreth 400 spektatorë mbushën sallën për të ndjekur filmin dramatik historik “Obraz”, i njohur në shqip si “Nderi”. Ky film i regjisorit Nikolla Vukçeviq, i bazuar në një ngjarje të vërtetë, sjell një histori të fuqishme të Luftës së Dytë Botërore, ku njeriu përballet me zgjedhje jetësore të vështira: të mbrojë jetën e një fëmije të huaj apo të shpëtojë familjen e vet. Ngjarja zhvillohet brenda 36 orësh, kur protagonisti Nur Doka, një shqiptar mysliman, pret në shtëpinë e tij një fëmijë ortodoks, duke rrezikuar gjithçka për nderin dhe besën.
Shqiptarët, zemra
morale e filmit
Në këtë film, shqiptarët luajnë një rol qendror dhe emocional. Nur Doka, i luajtur nga aktori Edon Rizvanolli, është protagonisti që mban në dorë fatin e fëmijës dhe tregon fuqinë e nderit dhe të besës. Përveç tij, aktorët shqiptarë nga Kosova si Alban Ukaj, Xhejlane Tërbunja dhe Selman Jusufi japin interpretime të thella dhe autentike, duke e bërë dramën më të prekshme dhe historikisht të besueshme. Përmes tyre, filmi thekson se nderi, guximi dhe humanizmi janë vlera universale që kapërcejnë dallimet fetare dhe kombëtare.
Marrëdhëniet ndërkombëtare dhe ndërfetare që shfaqen në film tregojnë se shqiptarët nuk janë thjesht pjesë e ngjarjes, por qendra morale dhe emocionale e saj, duke ndriçuar mesazhin universal të humanizmit dhe solidaritetit.
Një histori që prek zemrën
Përveç shqiptarëve, aktorët e tjerë si Elez Axhoviq, Aleksandar Radulloviq, Vuk Bullajiq, Nikolla Ristanovski dhe legjendari Zef Bato Dedivanoviq sjellin tension dhe intensitet në skenat dramatike, ndërsa fëmijët aktorë, Merisa Axhoviq dhe Hana Pavlloviq, përçojnë pafajësinë dhe pafuqinë që përforcon mesazhin moral të filmit.
Publiku reagoi me heshtje të thellë gjatë momenteve më dramatike dhe me duartrokitje të gjata në fund të shfaqjes.
Një thirrje për reflektim
mbi vlerat njerëzore
Filmi, i nominuar si propozimi zyrtar i Malit të Zi për Çmimn “Oscar” dhe i shpërblyer në festivale ndërkombëtare, tregon se “Obraz” / “Nderi” nuk është vetëm një rrëfim historik, por një thirrje për reflektim mbi vlerat që na bëjnë njerëz.
Shfaqja e këtij filmi në Ulqin tregoi se qytetarët janë të etur për histori që prekin zemrën, frymëzojnë dialog mbi nderin dhe moralin dhe vlerësojnë interpretimet e fuqishme të aktorëve shqiptarë që janë zemra e këtij filmi.
D. Teliqi