Mali i Zi ka kaluar në një etapë tjetër në negociatat me Bashkimin Evropian, duke mbyllur përkohësisht më shumë se gjysmën e kapitujve negociues.
Të martën (14 korrik 2026) në konferencën ndërqeveritare në Bruksel, Mali i Zi ka mbyllur dy kapituj të tjerë – Kapitullin 8 – Politika e konkurrencës, dhe kapitullin 29 – Bashkimi doganor, duke e çuar në 18 numrin e kapitujve të mbyllur përkohësisht nga gjithsej 33 kapituj negociues në procesin e anëtarësimit në Bashkimin Evropian.
Komisionerja për Zgjerimin e BE-së, Marta Kos, ka përkujtuar se kjo është konferenca e katërt ndërqeveritare, e cila nuk ka ndodhur që nga viti 2002, dhe hera e shtatë që ata takohen për të mbyllur kapitujt.
“Kapitujt që mbyllëm sot do të sjellin përfitime për qytetarët dhe ekonominë. Për kompanitë që duan të investojnë në Mal të Zi, kjo do të thotë se ato do të kenë një sërë rregullash që janë identike me pjesën tjetër të BE-së, që do të thotë më pak administratë. Të gjithë qytetarët e Malit të Zi së shpejti do të jenë në gjendje të gëzojnë të njëjtat rregulla si pjesa tjetër e BE-së”, ka thënë ajo.
Kos ka theksuar se jemi në fazën e fundit të pranimit në Bashkimin Evropian dhe se ky vit është vendimtar.
“BE po përgatitet për Malin e Zi. Tani është koha për të kaluar qëllimin dhe për të përfunduar reformat. Është ende e nevojshme të forcohen themelet demokratike të anëtarit tonë të ardhshëm dhe kjo, më shumë se çdo reformë, do të kërkojë përpjekjen e përbashkët të të gjithëve. Në ditët e mëparshme, isha e bindur për këtë në Mal të Zi, dhe kjo frymë do ta mbajë Malin e Zi”, ka thënë komisionerja e BE-së.
Kryeministri Millojko Spajiq, i cili e ka udhëhequr delegacionin malazez në konferencën ndërqeveritare, ka thënë se Mali i Zi nuk mund të kishte marrë lajme më të mira.
“Jemi më shumë se në gjysmë të rrugës, më shumë se gjysma e kapitujve janë mbyllur”, ka thënë ai.
Spajiq ka theksuar se në Parlamentin e Malit të Zi janë iniciuar ndryshime kushtetuese, të cilat janë shumë të rëndësishme për sundimin e ligjit.
“Ky është një demonstrim i fortë i pjekurisë dhe unitetit politik. Mali i Zi po punon shumë në të gjithë kapitujt dhe duke i mbyllur këta kapituj sot, ne konfirmojmë se jemi seriozë në lidhje me këtë rrugë”, ka shtuar ai.
Një hap të rëndësishëm drejt anëtarësimit në BE ka bërë edhe Shqipëria, e cila konsiderohet vendi i dytë më i avancuar në procesin e zgjerimit, duke mbyllur për herë të parë tre kapituj negociues.
“Ky është një moment historik për Shqipërinë, e cila po nis mbylljen e kapitujve negociues”, ka deklaruar Komisionerja për Zgjerimin e BE-së, Marta Kos.
Shqipëria synon t’i përfundojë negociatat për anëtarësim në BE deri në fund të vitit 2027.
E njohur jozyrtarisht si “Super e marta”, kjo ditë shënoi organizimin e numrit më të madh të konferencave ndërqeveritare në më shumë se dy dekada. Përpos Malit të Zi dhe Shqipërisë, edhe Ukraina dhe Moldavia hapen secila nga një klaster të ri negociatash.
Ndryshe nga vendet e tjera të Ballkanit Perëndimor, Kosova ende nuk e ka statusin e vendit kandidat për anëtarësim në BE. Ajo aplikoi për anëtarësim në fund të vitit 2022, por kërkesa e saj ende nuk është shqyrtuar.
(Kohapress/REL)