Faktori politik shqiptar këto ditë ka nisur sezonin e zgjedhjeve të drejtorëve në shkollat ku mësimi zhvillohet në gjuhën shqipe në Mal të Zi. Ky proces, si rëndom, mbahet formalisht në kuadër të Këshillit Kombëtar të Shqiptarëve, i cili jep mendimin për drejtorët, ku në vend që të shërbejë si një mekanizëm mbrojtës për pakicat, në realitet po degjeneron nepotizëm e servilizëm duke e komprometuar në tërësi procesin.
Përzgjedhja e kuadrit drejtues të shkollave parauniversitare u bazua kryesisht në kandidatët partiakë me ndikime politike dhe larg meritokracisë. Në vend që anëtarët e KKSH-së ta kundërshtojnë këtë praktikë, ata ad hoc i mbështetën kandidatët partiakë, duke treguar se ky institucion ka mbetur në rolin e një spektatori, pa bërë përpjekje për t’u faktorizuar si subjekt i pavarur dhe mbipartiak. Përkundrazi, KKSH gjendet në një “gjendje konservimi” duke inkurajuar partitë politike të plasojnë kandidatët e tyre në postin e drejtorëve të shkollave në gjuhën shqipe. Kësisoji ky subjekt nuk orientohet nga profesionalizmi, as nga drejtësia dhe morali, por mbetet i kapur nga politika dhe militantët e tyre.
Kandidatët që konkurruan për këtë post janë puro partiakë dhe nën dominimin e dy koalicioneve politike shqiptare, që janë pjesë e Qeverisë – Aleanca Shqiptare dhe Forumi Shqiptar. Në këtë kuadër, shumica e kandidatëve janë përafërsisht të njëjtë vetëm se kanë kërcyer, si pleshtat, nga njëra parti në tjetrën. Ata që para katër viteve ishin në Lëvizjen Qytetare “URA”, atëherë pjesë e pushtetit ose në PDS, kanë lëvizur drejt partive politike shqiptare që aktualisht gjenden në qeveri. Në këtë rirreshtim anëtarët e KKSH-së mbështetën kandidatët e Aleancës Shqiptare, ku bën pjesë ministri i të Drejtave të Njeriut dhe Pakicave, Fatmir Gjeka, kundrejt kandidatëve të Nik Gjeloshajt, zëvëndëskryeministër dhe ministër i Zhvillimit Ekonomik. Megjithatë duhet të presim edhe pak kohë për të parë se kush do të ketë ndikimin më të madh në vendimin final te Ministria e Arsimit dhe e Shkencës e Malit të Zi. Të dy këta politikanë, që flejnë nën çarçafin e Qeverisë, do të bëjnë çmos që kandidatët (militantët) e tyre të zgjidhen në poste aq të rëndësishme për arsimin në gjuhën shqipe, pasojat e të cilëve do t’i vuajnë shkollat dhe formimi i përgjithshëm i nxënësve.
Sipas sinjaleve të para, ndikimin më të madh në përzgjedhjen e këtij kuadri drejtues do ta ketë Forumi Shqiptar, të cilën gjë e dëshmon edhe zgjedhja drejtor e vëllait të ministrit të Administratës Publike, Marash Dukaj, në shkollën fillore “Bashkimi” në Skorraq të Hotit.
Prandaj duket shumë naive përpjekja e KKSH-së të luajë rolin e një partneri imponues kur gjithnjë e më shumë po zhytet në lojërat politike të partive që nuk çojnë askund, përveçse në humbjen e shpresës rinore për një të ardhme më të mirë.
KKSH, për fat të keq, në vazhdimësi bën shkelje të rënda ligjore duke nisur nga procedura e zgjedhjes së anëtarëve të tij, ku nënshkrimet kopjohen pa pikë turpi nga listat zgjedhore të partive politike shqiptare, te kurdisja e Kuvendit të Elektorëve, formimi i komisioneve e deri te Këshilli programor i “Kohës javore”, që janë mbuluar kryesisht me partiakë apo militantë të tyre. Në një subjekt të këtillë mungon mendësia e avancimit kulturor e arsimor, gjë që dëshmohet me mospërfshirjen e personaliteteve dhe ekspertëve të njohur nga shkenca, kultura dhe informimi. Si pasojë e kësaj qasjeje, disa projekte të inicuara dhe të realizuara nga jashtë, siç është rasti i librave të historisë për shkollat në gjuhën shqipe, KKSH i mbylli në sirtarin e vet dhe po hesht kundrejt Ministrisë së Arsimit dhe Shkencës, me të cilët duhet të përmbushet obligimi ligjor i programeve mësimore në gjuhën shqipe. Ky është dhe mbetet paradoksi i një institucioni kryesor të vetadministrimit kulturor, arsimor dhe politik të pakicës shqiptare, ku në vend të shërbimit për interesat kombëtare vepron si një filial politik për interesa të ngushta partiake.