Në kuadër të aktiviteteve të organizuara për shënimin e Ditës së Shkollës fillore “Gjergj Kastrioti – Skënderbeu” në Triesh, të hënën (18 maj 2026) u realizua një shëtitje edukative dhe rekreative në qytetet e bukura bregdetare të Kotorrit dhe Budvës. Në këtë aktivitet morën pjesë stafi i mësimdhënësve së bashku me nxënësit, të cilët patën mundësinë të kalojnë një ditë të mbushur me përvoja të reja, emocione pozitive dhe momente të paharrueshme. Gjatë rrugëtimit mbizotëronte një frymë bashkëpunimi, shoqërimi dhe respekti reciprok, duke e bërë këtë aktivitet edhe më të veçantë për të gjithë pjesëmarrësit.
Vizita në Kotorr u karakterizua nga interesimi i madh i nxënësve për historinë dhe arkitekturën e qytetit të vjetër. Ata patën mundësinë të shohin nga afër bukuritë kulturore dhe historike të këtij qyteti të njohur, i cili tërheq vizitorë nga vende të ndryshme të botës. Shëtitja nëpër rrugicat karakteristike të Kotorrit dhe njohja me trashëgiminë kulturore të qytetit ishte një përvojë shumë e vlefshme dhe edukative për nxënësit.
Pas vizitës në Kotorr, aktiviteti vazhdoi në Budva, ku pjesëmarrësit shijuan bukuritë natyrore të bregdetit, ajrin e pastër dhe atmosferën e gjallë të qytetit. Nxënësit kaluan kohë së bashku duke zhvilluar aktivitete të ndryshme, biseduar, bërë fotografi dhe krijuar kujtime që do t’i ruajnë gjatë në mendje.
Aktivitete të tilla kanë një rëndësi të veçantë në jetën shkollore, pasi përveç aspektit edukativ, ndikojnë pozitivisht edhe në zhvillimin social dhe emocional të nxënësve. Këto përvoja ndihmojnë në krijimin e një ambienti më të afërt dhe më miqësor ndërmjet nxënësve dhe mësimdhënësve, duke kontribuuar në forcimin e frymës së kolektivitetit dhe mirëkuptimit.
Donika Lulgjuraj