Tuz – Në Qendrën Kulturore-Informative “Malësia” në Tuz, u hap ekspozita personale e piktorit të njohur nga Shkodra, njëherazi përgjegjës i Galerisë së Arteve në Shkodër, z. Fatmir Juka, “Xhubleta entropia”.
Në prani të një numri të konsiderueshëm të admiruesve të arteve pamore, ka përshëndetur, Marina Ujkaj, sekretare e Sekretariatit për Vetëqeverisje Lokale në Komunën e Tuzit, e cila falënderoi piktorin nga Shkodra, ndërkohë që më vonë e shpalli të hapur këtë ekspozitë.
Ndërkaq, kuratori dhe piktori, Jozo Koçaj, ka folur mbi krijimtarinë artistike të piktorit Fatmir Juka i cili siç tha, duke vështruar çdo ditë kostumin e xhubletës në manekinen e vendosur tek dhoma e improvizuar atje sipër në çardak në katin e muzeut, nuk mundi të qëndronte indiferent e të tërhiqej nga ky kostum, “monument fundamental” i identitetit të vet.
“Dhe si i tillë ky “monument” kalon në një objekt eksplorimi për të, me tërë përmbajtjen e vet, dhe vazhdon ashtu pak nga pak ta tërheqë, derisa e fut në labirintet e misterit të vet, sikur ai plaku i vjetër i fshatit i cili të mahnit dhe pushton, të kënaq veshin, syrin, ndjenjat dhe krejt qenien me rrëfimet e tij jetësore të cilat ia lanë dhuratë vitet të cilat i mbart mbi supe”, u shpreh Koçaj.
Ai më tej tha se e zeza e cila përfshin pothuajse nëntëdhjetë për qind të xhubletës, është e gjithë fusha e veprimit të këtij cikli.
“Mbi këtë bazë të errët, siç shprehet vetë autori, vetë koha në formën më autentike ka lënë gjurmët e veta të pashlyeshme”, theksoi Jozo Koçaj, duke shtuar se për autorin e zeza është ajo e vërteta që nuk është mbarimi dhe fundi, por kufiri që të shpie tek drita.
Autori i kësaj ekspozite personale, Fatmir Juka, ka falënderuar përzemërsisht të gjithë të pranishmit në këtë ekspozitë, ku tha se ne duhet të jemi krenarë që xhubletën po e fusim si trashëgimi të UNESCO-s.
“Në këtë xhubletë ka një gjuhë kodesh që na thërrasin për ta zbuluar, një gjuhë që ia vlen dhe që është shkruar mbi të zezën. Në të gjithë kostumografinë tonë e shikoj që e zeza nuk përbën kufi. E zeza nuk përbën mbyllje, por një hapje. E zeza është një moment për të kaluar tek drita. Dhe kjo ka qenë mahnitja ime, ku sonte e përligji këtë mahnitje, duke qenë këtu, poshtë këtij mali, në këtë kufi në mes të dritës dhe universit”, u shpreh piktori dhe autori i kësaj ekspozite personale, Fatmir Juka.
Kjo është hera e parë që në Tuz hapet ekspozita, “Xhubleta entropia”, ndërsa do të qëndrojë e hapur deri më 13 qershor.
Ekspozita është organizuar nga Sekretariati për Vetëqeverisje Lokale i Komunës së Tuzit.
t. u.