Parlamenti i Kroacisë ka votuar për të rivendosur shërbimin e detyrueshëm ushtarak, në një sfond tensionesh të larta në Evropë pas agresionit rus në Ukrainë.
Ligjvënësit miratuan ndryshimet ligjore me 84 vota për dhe 11 kundër dhe me 30 abstenime në Parlamentin me 151 deputetë.
Bëhet e ditur se tani shërbimi ushtarak do të zgjasë dy muaj dhe do të ofrojë “trajnim bazë ushtarak”.
Ky vendim shënon një rikthim në rekrutimin e detyrueshëm ushtarak, i cili u pezullua në vitin 2008, kur vendi kaloi në një sistem vullnetar.
Ministria e Mbrojtjes e Kroacisë tha se qëllimi është t’u mësojë të rinjve aftësitë dhe njohuritë themelore që janë “të nevojshme në situata krize, në mënyrë që ata të kontribuojnë në sigurinë kombëtare”.
Ministri kroat i Mbrojtjes, Ivan Anushiq e justifikoi rikthimin e shërbimit të detyruar ushtarak me “situatën e ndryshuar të sigurisë”.
Autoritetet do të fillojnë t’i thërrasin rekrutët e lindur në vitin 2007 për kontrolle mjekësore deri në fund të vitit.
Rekrutët do të marrin një pagë dhe ata që kundërshtojnë shërbimin ushtarak mund të zgjedhin shërbimin civil në vend të kësaj.
Në këtë mënyrë, Kroacia ndjek shembullin e disa shteteve të tjera që më herët kanë vendosur të rikthejnë shërbimin ushtarak.
Në vitin 2015, Lituania e rifuti atë pjesërisht dhe Norvegjia u bë vendi i parë evropian që prezantoi shërbimin e detyrueshëm ushtarak për gratë.
Dy vjet më vonë, Suedia e rivendosi rekrutimin.
Franca filloi të votonte shërbimin e saj kombëtar të rikthyer rishtazi, të njohur si SNU, në vitin 2019. Në janar, presidenti francez Emmanuel Macron u bëri thirrje vullnetarëve të rinj të “përforcojnë” radhët e ushtrisë në një fjalim drejtuar personelit ushtarak francez.
Ndërsa në prill, ministri i Mbrojtjes i Belgjikës, Theo Francken, tha se donte të rriste numrin e rezervistëve të vendit nga rreth 6 600 në 20 000 dhe për ta bërë këtë shpresonte të rekrutonte të rinj për shërbim ushtarak vullnetar.
Kjo vjen pas një iniciative të ngjashme të njoftuar së fundmi në Holandë.
Në gusht, Qeveria e Gjermanisë miratoi një projektligj që propozonte një ligj të ri që synonte promovimin e rekrutimit vullnetar.
Debati mbi shërbimin e detyrueshëm ushtarak është aktualizuar në Evropë, sidomos pas agresionit rus në Ukrainë. Kësisoj shumë vende po e rishqyrtojnë nëse rekrutimi ushtarak mund të forcojë sigurinë e tyre kombëtare.
(Kohapress)