Ekipi i futbollistëve të Gjimnazit “25 Maji” në Tuz është shpallur kampion në futboll të vogël në kampionatin garues të të gjitha shkollave të mesme në Mal të Zi.
Nxënësit e kësaj shkolle kanë arritur të fitojnë dy ndeshjet finale të cilat janë zhvilluar në Plevlë me 10 mars me rezultatin 8: 2 ndaj ekipit të Plevlës dhe po ashtu shënuan epërsi në finale ndaj ekipit të Danillovgradit me të njëjtin rezultat.
Drejtoresha e kësaj shkolle, Milijana Daboviq në një prononcim për “Koha Javore” e vlerësoi lart fitoren e këtyre nxënësve në këtë kampionat, duke thënë se këtë ekip futbolli e përbëjnë talentë të dalluar në futboll, të cilët përveçse në ekip të shkollës, luajnë dhe në skuadra të njohura në rang kombëtar të Malit të Zi.
“Kjo fitore është arritje shumë e madhe për nxënësit, mësimdhënësit dhe në përgjithësi për shkollën tonë, duke qenë se të gjithë së bashku me një përkushtim të devotshëm arritëm ta shpërblejmë mundin e përbashkët me këtë rezultat. Kjo nuk është hera e parë që nxënësit tonë na sjellin rezultate të kënaqshme, por është një fitore në vargun e atyre që kanë pasur në të kaluarën. Ky gjimnaz ka qenë përherë i njohur me sportistë të dalluar”, u shpreh Daboviq.
Ajo më tej tregon se vitin që vjen, shkolla që ajo drejton do të jetë mikpritëse e kampionatit të shkollave të mesme në Mal të Zi, duke qenë se fituesi është nikoqir i kampionatit të radhës.
“Duke pasur parasysh fitoren tonë në këtë kampionat, në vitin 2018 do të jemi përfaqësues të Malit të Zi në kampionatin botëror të shkollave të mesme në futboll të vogël. Kampionati në fjalë zhvillohet edhe sivjet, mirëpo për fat të keq nuk arritëm të bëhemi pjesë e tij, për shkak të mungesës së sponsorëve. Në kampionatin e 2018-tës, do të përpiqemi me të gjitha mënyrat që këta djem të artë t’i dërgojmë në kampionatin botëror”, sqaroi Daboviq.
Vlen të përmendet se edhe dy nxënës të kësaj shkolle David Arapaj dhe Zijedin Beqaj, u shpallën kampionë në kategorinë për seniorë në sportin e taekwondos, në kampionatin “Zrenjanin Open” të mbajtur para pak ditësh në Serbi. Ata u shpërblyen me medalje të arta. t.u.