Koha javore: Si e vlerësoni fillimin e sezonit turistik 2026 në Ulqin? A i ka përmbushur pritjet tuaja?
Q. Hoxhiq: Jemi të kënaqur me fillimin e sezonit turistik 2026 në Ulqin. Gjatë gjithë muajit qershor është vërejtur një lëvizje e mirë e vizitorëve në qytet, çka tregon se sezoni ka nisur pozitivisht dhe, në një masë të madhe, ka përmbushur pritshmëritë tona.
Aktualisht, numri i mysafirëve që po qëndrojnë në Ulqin është një tregues inkurajues për ecurinë e sezonit. Në këtë rezultat ka ndikuar edhe moti shumë i favorshëm, me temperatura të larta gjatë gjithë periudhës. Kur kushtet atmosferike janë të mira, turistët kanë më shumë dëshirë të shijojnë pushimet, plazhet dhe ofertën turistike që ofron qyteti ynë.
Koha javore: Sipas të dhënave që dispononi, sa turistë po qëndrojnë aktualisht në rivierën e Ulqinit dhe si krahasohet kjo shifër me të njëjtën periudhë të vitit të kaluar? Nga cilat tregje vijnë më së shumti mysafirët këtë sezon? A ka tregje të reja që po shënojnë rritje?
Q. Hoxhiq: Sipas të dhënave më të fundit që kemi në dispozicion, për periudhën 18-25 qershor, në rivierën e Ulqinit po qëndrojnë 14506 turistë, që paraqet një rritje prej 12% krahasuar me të njëjtën periudhë të vitit të kaluar.
Nga numri i përgjithshëm, 13978 janë turistë të huaj, ndërsa pjesa më e madhe e tyre janë të akomoduar në kapacitetet e akomodimit privat, çka konfirmon edhe rëndësinë që ky sektor ka për turizmin e Ulqinit.
Sa i përket strukturës së mysafirëve, numrin më të madh e përbëjnë turistët nga Serbia me 27%, të ndjekur nga Kosova me 24%, Bosnja dhe Hercegovina me 11%, Gjermania me 5% dhe Polonia me 4%.
Këta tregues janë inkurajues dhe na japin arsye për optimizëm se sezoni turistik po zhvillohet në drejtimin e duhur. Presim që gjatë muajve korrik dhe gusht këto shifra të rriten edhe më tej, duke qenë se tradicionalisht ato përfaqësojnë kulmin e sezonit turistik.
Koha javore: A po respektohet detyrimi për regjistrimin e mysafirëve në objektet akomoduese private dhe hoteliere? Sa i kënaqur jeni me nivelin e regjistrimit?
Q. Hoxhiq: Regjistrimi i mysafirëve, apo më saktë mosregjistrimi i rregullt i tyre, mbetet një sfidë që përsëritet prej vitesh. Pavarësisht thirrjeve dhe apeleve tona të vazhdueshme drejtuar ofruesve të akomodimit privat dhe hotelier, ky detyrim ligjor ende nuk respektohet në nivelin që do të dëshironim.
Është e rëndësishme të theksohet se regjistrimi i turistëve nuk është vetëm një obligim ligjor apo një taksë turistike, por edhe një çështje e sigurisë. Ai mundëson evidentimin e saktë të personave që qëndrojnë në vendin tonë, lehtëson menaxhimin e situatave të ndryshme dhe siguron statistika reale mbi numrin e turistëve, të cilat janë thelbësore për planifikimin dhe zhvillimin e mëtejshëm të turizmit.
Gjithashtu, një pjesë e konsiderueshme e të ardhurave nga taksa e banimit i dedikohet Organizatës Turistike dhe investohet në promovimin e destinacionit, organizimin e aktiviteteve dhe përmirësimin e ofertës turistike. Duhet të kemi parasysh se pagesa e taksës së banimit është një praktikë standarde në të gjitha vendet që vizitojmë si turistë, prandaj është e rëndësishme që edhe ne ta respektojmë dhe ta zbatojmë këtë detyrim në mënyrë të plotë.
Koha javore: Cilat janë pasojat ose gjobat për ata që nuk i regjistrojnë mysafirët sipas ligjit?
Q. Hoxhiq: Ligji parashikon masa ndëshkuese për të gjithë ofruesit e akomodimit që nuk i regjistrojnë mysafirët në përputhje me dispozitat ligjore. Kompetenca për kontrollin dhe zbatimin e këtyre masave i takon organeve inspektuese, të cilat, në rast të konstatimit të parregullsive, shqiptojnë gjobat e përcaktuara me ligj.
Megjithatë, qëllimi ynë nuk është ndëshkimi, por rritja e ndërgjegjësimit dhe respektimi i ligjit. Ne vazhdojmë t’u bëjmë thirrje të gjithë ofruesve të akomodimit që t’i regjistrojnë mysafirët rregullisht, sepse kjo është në interes të të gjithëve – rrit sigurinë, siguron statistika të sakta për sektorin e turizmit dhe kontribuon në krijimin e kushteve më të mira për zhvillimin e destinacionit tonë turistik.
Koha javore: A bashkëpunoni me inspektoratet dhe institucionet kompetente për të luftuar ekonominë informale në turizëm?
Q. Hoxhiq: Po, Organizata Turistike ka një bashkëpunim të vazhdueshëm me inspektoratet dhe institucionet kompetente në drejtim të luftimit të ekonomisë informale në sektorin e turizmit. Edhe pse kompetencat tona janë kryesisht në fushën e promovimit dhe zhvillimit të turizmit, ne jemi në komunikim të vazhdueshëm me organet përgjegjëse, duke shkëmbyer informacione dhe duke mbështetur aktivitetet që synojnë respektimin e ligjit.
Koha javore: Çfarë aktivitetesh kulturore, sportive dhe argëtuese janë planifikuar gjatë muajve të verës për të pasuruar ofertën turistike?
Q. Hoxhiq: Organizata Turistike e Ulqinit edhe këtë vit ka përgatitur një kalendar të pasur aktivitetesh kulturore, sportive dhe argëtuese, me qëllim që oferta turistike të jetë sa më e larmishme dhe tërheqëse për vizitorët gjatë gjithë sezonit.
Aktivitetet kanë nisur që në muajin maj me manifestimin e hapjes së sezonit turistik dhe vazhdojnë gjatë gjithë verës me ngjarje të ndryshme që promovojnë kulturën, traditën dhe vlerat e Ulqinit.
Në periudhën që vjen na presin disa prej manifestimeve më të rëndësishme, si Festivali EXIT, manifestimi tradicional Bojanovanje, Dita e Shalqinit, Panairi i Librit, Dita e Bamjeve, si dhe shumë aktivitete të tjera kulturore, sportive dhe artistike. Gjithashtu, në muajin gusht Skena Verore do të hapë dyert e saj me një program të pasur koncertesh, shfaqjesh teatrore dhe ngjarjesh kulturore. Do të vijohet me Mondialin e Miqësisë, me koncertin e artistëve të rinj në Plazhin e Madh si dhe me shumë aktivitete tjera.
Besojmë se këto aktivitete, përveçse pasurojnë përvojën e turistëve, kontribuojnë edhe në promovimin e Ulqinit si një destinacion që ofron jo vetëm plazhe dhe natyrë të mrekullueshme, por edhe një jetë kulturore dhe artistike dinamike gjatë gjithë sezonit veror.
Koha javore: Sa kontribuojnë manifestimet tradicionale në zgjatjen e sezonit turistik dhe në promovimin e Ulqinit?
Q. Hoxhiq: Manifestimet tradicionale kanë një rol shumë të rëndësishëm, si në promovimin e Ulqinit, ashtu edhe në zgjatjen e sezonit turistik. Ato nuk janë vetëm aktivitete argëtuese, por edhe një mënyrë për të prezantuar kulturën, traditën, gastronominë dhe identitetin e qytetit tonë.
Përmes këtyre manifestimeve arrijmë të tërheqim vizitorë jo vetëm gjatë kulmit të sezonit, por edhe në periudhat para dhe pas tij, duke krijuar motive shtesë për të vizituar Ulqinin. Kjo ndikon pozitivisht edhe në ekonominë lokale, pasi përfitojnë hotelierët, restorantet, bizneset e vogla dhe të gjithë ata që janë të lidhur me sektorin e turizmit.
Pikërisht për këtë arsye, Organizata Turistike vazhdon të investojë dhe të mbështesë organizimin e manifestimeve tradicionale dhe kulturore, sepse ato janë një nga instrumentet më të rëndësishme për promovimin e Ulqinit si një destinacion që ofron shumë më tepër sesa diell dhe det. Qëllimi ynë është që Ulqini të jetë një destinacion tërheqës gjatë sa më shumë muajve të vitit, ndërsa manifestimet janë një nga shtyllat kryesore për arritjen e këtij objektivi.
Koha javore: Çfarë po bën Organizata Turistike në fushën e promovimit të Ulqinit në tregjet rajonale dhe ndërkombëtare? A po jep rezultat kjo strategji?
Q. Hoxhiq: Promovimi i Ulqinit në tregjet rajonale dhe ndërkombëtare mbetet një nga prioritetet kryesore të Organizatës Turistike. Gjatë këtij viti kemi marrë pjesë në panaire të rëndësishme të turizmit, si në Beograd, Shtutgart, Vjenë, Prishtinë, ku kemi prezantuar ofertën turistike të Ulqinit para partnerëve, operatorëve turistikë dhe vizitorëve potencialë.
Përveç pjesëmarrjes në panaire, kemi zhvilluar një sërë aktivitetesh promovuese përmes mediave, platformave digjitale dhe rrjeteve sociale, si dhe kemi organizuar takime me partnerë të industrisë së turizmit, influencerë dhe përfaqësues të mediave. Gjithashtu, jemi në komunikim të vazhdueshëm me vizitorët dhe i kushtojmë rëndësi të veçantë promovimit të përvojave autentike që ofron Ulqini.
Besojmë se kjo strategji po jep rezultate konkrete. Këtë e dëshmon interesi në rritje për destinacionin tonë, numri i turistëve që po zgjedhin Ulqinin për pushimet e tyre, si dhe fakti që çdo vit kemi një numër gjithnjë e më të madh të vizitorëve të përsëritur. Sigurisht, promovimi është një proces i vazhdueshëm dhe ne do të vazhdojmë të investojmë në prezantimin e Ulqinit në tregjet më të rëndësishme, me synimin për të forcuar pozicionin e tij si një nga destinacionet kryesore turistike në rajon.
Koha javore: Si e vlerësoni bashkëpunimin me hotelierët, pronarët e akomodimeve private, restorantet dhe operatorët turistikë?
Q. Hoxhiq: Bashkëpunimin me hotelierët, pronarët e akomodimeve private, restorantet dhe operatorët turistikë e vlerësojmë si shumë të rëndësishëm dhe, në përgjithësi, mjaft të mirë. Organizata Turistike mban komunikim të vazhdueshëm me të gjithë aktorët e sektorit, sepse vetëm përmes një partneriteti të ngushtë mund të ndërtojmë një ofertë turistike cilësore dhe konkurruese. Edhe Programi i punës për vitin 2026 është bërë në koordinim me përfaqësuesit e sektorëve privatë, gjë që dëshmon faktin se kemi një bashkëpunim të mirë me të gjithë.
Sigurisht, gjithmonë ka hapësirë për përmirësim, megjithatë, besoj se ekziston një vetëdije gjithnjë e më e madhe se suksesi i sezonit turistik është përgjegjësi e përbashkët.
Objektivi ynë është që së bashku të krijojmë një përvojë sa më cilësore për çdo vizitor që zgjedh Ulqinin. Kur institucionet dhe sektori privat bashkëpunojnë, rezultatet janë të dukshme – rritet cilësia e shërbimeve, forcohet imazhi i destinacionit dhe përfiton e gjithë ekonomia lokale.
Koha javore: Cilat janë pritjet tuaja për kulmin e sezonit në korrik dhe gusht? A prisni rekord të ri të vizitave dhe të netëve të qëndrimit?
Q. Hoxhiq: Bazuar në treguesit që kemi deri tani, presim që muajt korrik dhe gusht të jenë kulmi i sezonit turistik dhe të shënojnë një frekuentim shumë të mirë. Fillimi i sezonit ka qenë inkurajues, me një numër të konsiderueshëm turistësh dhe një interes të vazhdueshëm për Ulqinin, gjë që na bën optimistë për javët në vijim.
Nëse kushtet atmosferike mbeten të favorshme dhe të gjitha shërbimet funksionojnë në nivelin e duhur, besojmë se kemi potencial për të arritur rezultate shumë të mira, madje edhe për t’iu afruar ose për të tejkaluar rekordet e viteve të fundit për sa i përket numrit të vizitorëve.
Megjithatë, për ne nuk është i rëndësishëm vetëm numri i turistëve. Po aq e rëndësishme është që çdo vizitor të largohet nga Ulqini me përshtypje pozitive dhe të dëshirojë të rikthehet. Ky është matësi më i mirë i suksesit të një sezoni turistik dhe baza për zhvillimin afatgjatë të turizmit në qytetin tonë.
Koha javore: Çfarë mesazhi do t’u dërgonit qytetarëve të Ulqinit dhe të gjithë atyre që jetojnë nga turizmi për rëndësinë e mikpritjes dhe ofrimit të një shërbimi cilësor?
Q. Hoxhiq: Mesazhi im për të gjithë qytetarët e Ulqinit dhe për të gjithë ata që jetojnë nga turizmi është që të vazhdojmë ta ruajmë dhe ta kultivojmë mikpritjen, e cila ka qenë gjithmonë një nga vlerat më të mëdha të qytetit tonë. Çdo turist që vjen në Ulqin duhet të ndihet i mirëpritur, i respektuar dhe i kënaqur me shërbimin që merr.
Suksesi i sezonit turistik nuk varet vetëm nga bukuritë natyrore që na ka dhuruar natyra, por edhe nga sjellja, profesionalizmi dhe përkushtimi i secilit prej nesh. Një buzëqeshje, një shërbim cilësor dhe një qasje miqësore janë reklama më e mirë për Ulqinin dhe arsyeja kryesore që turistët të rikthehen përsëri.
Në këtë drejtim, është shumë e rëndësishme që të vazhdojmë të jemi lojalë ndaj çmimeve dhe që ato të mos rriten në mënyrë të paarsyeshme, por të mbeten në nivele të qëndrueshme siç kanë qenë, në mënyrë që të ruajmë konkurrueshmërinë e destinacionit dhe të mos dëmtojmë imazhin e Ulqinit në treg.
Prandaj, u bëj thirrje të gjithë qytetarëve dhe të gjithë atyre që punojnë në turizëm që të japin kontributin e tyre maksimal. Vetëm së bashku mund ta forcojmë imazhin e Ulqinit si një destinacion modern, mikpritës dhe konkurrues, ku çdo vizitor largohet me kujtime të bukura dhe me dëshirën për t’u kthyer sërish.
Bisedoi: D. Teliqi