Javën e kaluar banorët e Malësisë i dhanë lamtumirën e fundit njërit prej veprimtarëve të dalluar në tri dekadat e fundit, juristit të diplomuar, Vasel Sinishtaj i cili u nda nga jeta në moshën 65-vjeçare. Në karrierën e tij profesionale, ai u dëshmua si profesionist i përkushtuar në drejtësi, kudo që punoi dhe veproi. Si njëri nga veteranët në këtë profesion nga treva e Malësisë, ishte i njohur në qarqet juridike në Podgoricë, ku punoi në institucione të larta të kryeqytetit, kryesisht në Qendrën për Punë Sociale ku erdhi në shprehje humanizmi i tij, për të udhëzuar dhe ndihmuar njerëzit në nevojë. Edhe pse mjaft shpesh i kufizuar nga normat e parapara në këtë fushë, ai falë ndjenjave humane që kishte kultivuar gjithë jetës dhe orientimit shpirtëror të tij për të ndihmuar të tjerët, asnjëherë nuk hezitoi të ndihmonte njerëzit pa dallim. Ajo që duhet veçuar për tashmë të ndjerin Vasel, është dashuria e madhe që ndjente për vendlindjen e tij, për bashkëvendësit dhe bashkëkombësit kudo e që edhe vet Vaselin e kishte bërë shumë të dashur për të gjithë ata që e njihnin apo kishin pasur rastin t’i drejtohen për udhëzime, apo ndonjë ndihmë tjetër. Edhe nga përvoja personale jo e pakët, jam bindur shumë herë në dashamirësinë e tij ndaj vlerave kombëtare që i theksonte kudo, pavarësisht ambientit apo zyrës ku punonte përreth 35 vite të plota. E përsëris atë që e kam thënë haptas në ndonjë rast të angazhimeve të përbashkëta se zyra ku punonte Vaseli, ka qenë zyre e njohur ku flitej shqip në kryeqytet, për ç’gjë janë bindur shumë banorë të Malësisë dhe të tjerë, që i janë drejtuar kësaj zyre për nevoja dhe procedura të ndryshme. Falë emrit të mirë të fituar me përkushtim vite e dekada të tëra, Vaseli në angazhimin e tij partiak në subjekte politike nacionale, arriti të fitojë mandatin si deputet në Parlamentin e Malit të Zi, ku pikërisht nga vetë ai u dëgjua fjala shqip edhe në pushtetin ligjdhënës të këtij vendi. Ndërkohë ai nuk hezitoi asnjëherë të flasë me zë të lartë për nevojat dhe kërkesat e banorëve shqiptarë në Mal të Zi. Si njohës i mirë i normave ligjore, konventave kombëtare e ndërkombëtare, Vaseli gjithnjë insistonte në përmbushjen e detyrimeve ligjore nga cilido pushtet, në respektim të drejtave dhe kërkesave, sidomos të pjesëtarëve të popujve pakicë në Mal të Zi. E gëzonte shumë çdo avancim në këtë drejtim dhe gjithherë dëshironte që të arriturat e ngjashme t’i ndante me bashkëveprimtarët e tij. Si njohës i mirë i rrjedhave në vend dhe profesionist i afirmuar në fushën e drejtësisë, Vaseli ishte i respektuar edhe nga kundërshtarët e vet politikë, pasi ai gjithherë ishte në anën e së drejtës, i gatshëm për marrëveshje e kompromise në arritjen e synimeve të parapara në interesin më të gjerë. Dy vitet e fundit, ai ishte në detyrën e kryeadministratorit në Komunën e Tuzit dhe gjithherë i gatshëm në përkrahje të kolegëve të rinj, me qëllim të funksionimit sa më të mirë të komunës së re të Tuzit. Veprat e njerëzve vullnetmirë, profesionist në punë dhe të përkushtuar për të ndihmuar të tjerët, nuk i shlyen koha por është mirë ndonjë rresht përkujtimi nga bashkëkohësit e vet në nderim të figurës së përgjithshme të njerëzve tanë, siç ishte tashmë i ndjeri, Vasel Sinishtaj.