Të mërkurën e kaluar në moshën 93-vjeçare vdiq mësuesi veteran Manush Kasneci.
Ai u lind në fshatin Brajshë, Komuna e Ulqinit, në vitin 1928. Shkollën katërklasëshe e kreu në gjuhën serbe në Katërkollë. Në moshën 16-vjeçare, si shumë të rinj iu bashkua aradhave partizane dhe mori pjesë në Luftën Nacionalçlirimtare si pjesëtar i Brigadës së Dhjetë Malazeze. Menjëherë pas luftës u regjistrua në shkollën 7-vjeçare në Tuz, ku kreu me sukses klasat V-VII. Ka ndjekur edhe kurset pedagogjike që u organizuan në Ulqin në vitin 1946 dhe 1947, në Nikshiq e vende të tjera. Krahas punës si mësues vijoi shkollimin e mëtejshëm dhe arriti të mbarojë Shkollën Normale në Shkup.
Si mësues ka filluar të punojë në shkollën e hapur në Ambull, në kushte shumë të vështira, duke qenë mësuesi i parë në këtë shkollë. Për disa vite ka punuar si mësues i pakualifikuar duke u transferuar prej një vendi në tjetrin. Ka punuar edhe në shkollat në fshatrat e Krajës, në Katërkollë, Kravar, Megjureç, ku mësimin e zhvillonte në gjuhën serbe, ndërsa pjesën më të madhe të punës e kaloi në paralelen e ndarë në Millë të Shkollës Fillore “Bedri Elezaga”, qysh në vitin 1953, kur për të parën herë u hap shkolla. Në këtë shkollë do ta përfundojë edhe karrierën pedagogjike në vitin 1973, duke u pensionuar në moshë të re.
Mësuesi Manush Kansneci ishte i ri inteligjent dhe arsimdashës. Dashuria për arsimin bëri që përkundër kushteve të vështira, ai të jetë i vetmi nga vëllezërit e tij dhe ndër fëmijët e paktë të brezit të tij që do të vijojë shkollimin. Si mësues ka punuar shumë duke mësuar shumë gjenerata të nxënësve nga klasa e parë deri në klasën e katërt. Është angazhuar edhe për organizimin e kurseve për zhdukjen e analfabetizmit. Përveç arsimit është marrë edhe me veprimtari shoqërore e politike.
U varros të enjten (e kaluar) në Ulqin.
(Kohapress)