Të hënën më 21 mars 2021, pas një sëmundje disa mujore në moshën 82 vjeçare vdiq.
Shevqet Draga, mësues në pension. Ai ka lindur me 6 janar 1939 në Oblikë të Anës së Malit(Shkodër), ndërsa për shkaqe familjare nga viti 1941 vendosën familjarisht të jetojnë në Draginë. Shkollën e ultë fillore e ka kryer në Sukubinë, atë të lartën në Katërkollë, ndërsa shkollën e mesme normale në Prishtinë. I takon brezit të parë që kryen shkollën tetëvjeçare në Anë të Malit.
Në profesionin e mësuesit fillimisht ka punuar në Shkollën Fillore “Gjergj Kastrioti – Skënderbeu” në Ostros të Krajës (1957-1965) ndërsa më pas në paralelet e ndara në Krythë, Fraskanjel, Kravar, Shtodër e Sukubinë në kuadër të Shkollës Fillore “Bedri Elezaga” në Katërkollë. Në pension ka dalur në vitin 1999.
Gjatë shërbimit në arsim për katër dekada ka qenë i përkushtuar në edukimin e brezave të rinj, u dallua si mësues punëtor dhe i suksesshëm. Ndonëse në kushte të papërshtatshme sociale në saje të ndërrimit të vendbanimit në shkollat e ciklit të ulët, me paralele të kombinuara i mbeti besnik profesionit të mësuesit.
Ndonëse edhe ma herët ka pasur pasion mbledhjen e materialit të trashëgimisë kulturore në Anë të Malit, pas daljes në pension(1999) është treguar aktiv duke mbledhur e shënuar lëndë me interes. Dhe në sajë të këtij angazhimi ka botuar librin “Ngjarje dhe ndodhi në Anë të Malit” Art Club, Ulqin, 2015, që është i veçantë për nga lënda e prezantuar si dhe i vetmi si i tillë në shqip tek ne deri më tash. Me mjaft interes janë edhe materiale e tjera në dorëshkrim si “Shënime etnografike nga Ana e Malit”, “Gjeanologjia familjare në fshatrat e Anës së Malit”, “Historiku i shkollave fillore në fshatrat Sukubinë, Kravar e Shtodër(1945-2000)” etj. Këto dorëshkrime dëshmojnë përkushtimin në mbledhjen e materialit me vlerë të veçantë etnografike që duhet të botohen në të ardhmen.
N.Draga