Të hënën, më 22 mars, në moshën 86-vjeçare vdiq mësuesi veteran Ibrahim Cuca.
Ai u lind në fshatin Sukubinë të Ulqinit, më 6 mars 1935, dhe i takon brezit të mësuesve të parë të kualifikuar. Rrjedh nga një familje e njohur. Mësimet e para katërvjeçare i kreu në shkollën fillore në Sukubinë, kurse katër vitet e ciklit të dytë i kreu në Katërkollë. Shkollën Normale e filloi në Gjakovë, për t’u transferuar më pas në Prishtinë, ku diplomoi në vitin 1955.
Pas kryerjes së shërbimit ushtarak, në vitin 1959/1960 filloi punën si mësimdhënës në fshatin Kllezën. Ka punuar po ashtu edhe në paralelet e ndara në fshatrat Krythë, Millë, Shëngjergj, më së gjati në Shtodër dhe së fundi në Sukubinë, deri në daljen në pension në vitin 1998.
Në monografinë “Arsimi shqip në Anë të Malit 1945-1985”, autorja dhe ish-arsimtarja e Gjuhës dhe letërsisë shqipe, Syme Kokaj, shkruan se kudo që punoi mësues Ibrahimi mbeti shembull i mirë për të tjerët dhe njeri me virtyte njerëzore.
Ai ishte mësues i përkushtuar që e donte dhe e vlerësonte profesionin e vet, duke e vënë në shërbim të shoqërisë. Për nga natyra, ishte i qetë, i dashur, i ngrohtë me nxënësit, prindërit e tyre dhe me fshatarët në përgjithësi. Gëzonte autoritet jo vetëm te nxënësit e tij, por edhe te mbarë shoqëria. Me nxitjen e tij shumë femra do të ndjekin mësimet në periudhën kur një gjë e tillë ishte në njëfarë mënyre tabu.
Mësues Ibrahimi është dalluar për punë të suksesshme dhe rezultate të dukshme, gjë që është vlerësuar qoftë nga kolegët e tij, drejtorët e Shkollës Fillore në Katërkollë, por edhe nga inspektorët dhe këshilltarët pedagogjikë.
Për punën e tij është vlerësuar me mirënjohje nga shkolla ku ka punuar, por edhe në nivel të Komunës së Ulqinit. Kështu në vitin shkollor 1964/1965 u shpall mësuesi më i mirë i Shkollës Fillore “Bedri Elezaga”, kurse në vitin 1989/1990 Bashkësia Vetëqeverisëse e Interesit për Edukim dhe Arsim Parashkollor dhe Fillor – Ulqin i ndanë diplomën “Punëtori më i mirë i arsimit” në Komunën e Ulqinit, “për rezultate të veçanta në punë dhe kontribut të dalluar në teorinë dhe praktikën edukativo-arsimore”.
Deri në momentet e fundit të jetës së tij ishte vital dhe gëzonte shëndet të mirë.
U varros po të hënën, në varrezat në vendlindjen e tij në Sukubinë.
(Kohapress)