Kuvendi i Malit të Zi, me 46 vota për, ka miratuar të premten në Cetinë Propozimligjin për konfirmimin e Traktatit Veriatlantik, me të cilin janë krijuar kushtet për anëtarësimin e Malit të Zi në NATO.
Përpos deputetëve të shumicës parlamentare, për anëtarësimin e Malit të Zi në NATO kanë votuar edhe katër deputetët e Partisë Socialdemokrate të cilët e kanë ndërprerë bojkotin e Kuvendit pas një periudhe të gjatë.
Deputetët e Frontit Demokratik dhe disa qindra përkrahës të tyre kanë protestuar para Kuvendit të Malit të Zi, kurse pjesa tjetër e opozitës së ashtuquajtur qytetare vendimin e Kuvendit për anëtarësim në NATO e ka pritur në shtëpi.
Vendimi për anëtarësimin e Malit të Zi në NATO vlerësohet si historik dhe ngjarja më e rëndësishme politike pas ripërtëritjes së pavarësisë së Malit të Zi në vitin 2006.
Kryetari i Kuvendit të Malit të Zi, Ivan Brajoviq, ka theksuar se ky është një moment historik.
Ai ka porositur se Mali i Zi “nuk ka nevojë për ndarje të mëtejshme, por për bashkim që përforcon shtetësinë e Malit të Zi”.
Kryeministri i Malit të Zi, Dushko Markoviq, ka thënë se me anëtarësimin në NATO, Mali i Zi nuk përfiton asgjë çfarë nuk e meriton dhe nuk i takon.
“Shikuar historikisht, për vendin tonë në shoqërinë e vendeve më të zhvilluara kanë meritë gjeneratat e politikanëve në dhjetë vitet e fundit, por edhe gjeneratat e të paktën dy shekujve të fundit”.
Ndërkaq ish-kryeministri Millo Gjukanoviq, njëherazi lider i Partisë Demokratike të Socialistëve, ka thënë se ky është sukses i shoqërisë e jo i individëve.
“Jam i bindur se ky është vendimi më i rëndësishëm që Mali i Zi merr në historinë e tij të re, jo pë shkak të përkatësisë në këtë apo atë organizatë por për shkak të asaj që përkatësia në Aleancën NATO do të thotë për shoqërinë malazeze”, ka thënë Gjukanoviq, i cili ka marrë pjesë në seancën e Kuvendit të Malit të Zi.
Vetë NATO-ja ka përshëndetur dhe shprehur kënaqësi për vendimin e Malit të Zi për t’u anëtarësuar në këtë organizatë.
“Anëtarësimi i afërt i Malit të Zi në NATO do t’u dërgojë mesazhin e fuqishëm vendeve të tjera që janë të interesuar për anëtarësim në Aleancë se puna vetëmohuese, reforma, promovimi i demokracisë, lufta kundër korrupsionit, shpaguhen”, ka thënë ndihmëssekretari i përgjithshëm i NATO-s, James Appathurai.
Shqipëria dhe Kosova kanë përshëndetur po ashtu vendimin e Malit të Zi për t’u anëtarësuar në NATO.
Ministri i Punëve të Jashtme të Kosovës, Enver Hoxhaj, ka thënë se anëtarësimi në NATO i Malit të Zi, është një hap shumë i rëndësishëm për sigurinë dhe stabilitetin e Ballkanit.
(Kohapress)