Ulqin – Mbi 86 për qind e qytetarëve të Ulqinit mendojnë se korrupsioni në këtë komunë është shumë ose kryesisht i përhapur, tregojnë rezultatet e hulumtimit të kryer nga Organizata Joqeveritare “Ul Info”, që janë prezantuar në një konferencë për shtyp të enjten.
Ndërkaq sa i përket perceptimit mbi korrupsionin, gati 94 për qind e ulqinakëve mendojnë se korrupsioni ekziston në Mal të Zi, madje 78 për qind janë shprehur se ekziston në masë të madhe.
Hulumtimi është kryer në kuadër të projektit “Ulqini kundër korrupsionit”, të cilin “Ul Info” e realizon si pjesë e programit “Mendo lokalisht – vepro lokalisht”, me mbështetjen e Delegacionit të Bashkimit Evropian në Mal të Zi. Ai është realizuar në periudhën 15 shkurt – 15 mars, ku janë anketuar 300 persona.
Rreth 35 për qind e qytetarëve të Ulqinit mendojnë se ky qytet ka probleme të mëdha.
Sa i përket korrupsionit, 8.3 për qind e të anketuarve e kanë renditur atë si problemin më të madh, ndërsa 25 për qind e tyre e shohin papunësinë si problemin më të madh. Për 12.3 për qind të tyre, problemi më i madh është pushteti dhe administrata, për 9.3 për qind standardi i ulët jetësor, kurse për 7.7 për qind kriza ekonomike.
Të dhënat e hulumtimit janë komentuar nga Ana Neneziq, koordinatore e programit pranë Qendrës për Arsim Qytetar, drejtori i MogUl-it, Xhemal Peroviq, dhe drejtori i Ul Info, Mustafa Canka.
Ata kanë thënë se duke analizuar të dhënat e fituara mund të arrihet në përfundimin se të gjithë duhet të jemi të brengosur.
Sipas tyre, qytetarët e Ulqinit e dinë çfarë është korrupsioni, kanë rezistencë ndaj kësaj të keqeje, mendojnë se jetojnë në shtet shumë të korruptuar dhe komunitet lokal kryesisht të korruptuar.
Përpjekjet e qeverisjes për luftimin e korrupsionit vlerësohen si të dobëta, prandaj ekziston nevoja për informim dhe edukim më të mirë të qytetarëve.
Ata kanë thënë se është evidente përhapja e mosbesimit në vullnetin politik për luftë kundër korrupsionit, gjegjësisht strategjitë dhe masat qeveritare vlerësohen më shumë si të lidhura me procesin e negociatave me Bashkimin Evropian, e më pak si vullnet dhe gatishmëri e sinqertë për luftë kundër korrupsionit.
Ata kanë nënvizuar se sektori civil dhe mediat duhet të përkrahin fuqishëm çdo aktivist apo grupim në luftë kundër korrupsionit.
Pjesë e hulumtimit kanë qenë edhe çështje të tjera, që në mënyrë të drejtpërdrejtë apo të tërthortë lidhen me korrupsionin, si dhe përhapja e tij në fusha të veçanta. i.k.