Sipas të dhënave të Kombeve të Bashkuara për vitin 2015, Shqipëria radhitet e dyta pas Bosnjës e Hercegovinës për numrin e banorëve që e kanë braktisur vendin e tyre dhe janë përcaktuar të jetojnë në një vend tjetër. Pas tyre radhiten Maqedonia, Portugalia, Mali i Zi dhe Moldavia.
Sipas të dhënave nga viti 2015, nga këto vende ka imigruar gati një e pesta e banorëve të lindur në to. Numri më i madh i banorëve është larguar nga Bosnja e Hercegovina, rreth 1,6 milion sish, të lindur në këtë vend dhe tani jetojnë në vende të tjera, që i bie 43.3 për qind, ose 4.5 për qind më shumë nga vendi që e ndjek në këtë listë, Shqipëria, me 38.8 për qind.
Të dhënat i referohen vendit të lindjes së të larguarve.
Sipas kësaj liste, nga Maqedonia dhe Mali i Zi janë larguar 24.8 për qind, përkatësisht 22.1 për qind e banorëve të lindur në to.
Nga Kroacia një e pesta e banorëve të lindur aty kanë shkuar për të jetuar në ndonjë vend tjetër, përkatësisht 20.4 për qind, ndërsa nga Serbia 10.9 për qind e banorëve, që përbën përqindjen më të ulët në rajon.
Të dhënat i referohen vendit të lindjes dhe jo shtetësisë ose përkatësisë etnike.
Numri më i madh i banorëve të Bosnjës e Hercegovinës janë shpërngulur në Kroaci, më së shumti banorë të Serbisë janë vendosur në Austri, kurse më së shumti malazezë në Serbi.
Pavarësisht se në këtë listë nuk ka të dhëna për Kosovën, nëse kemi parasysh faktin se shqiptarët përpos Shqipërisë jetojnë edhe në vende të tjera të rajonit që prijnë në këtë listë dhe se trevat ku jetojnë shqiptarët kanë përjetuar shkallën më të lartë të migrimit, atëherë mund të supozohet se sa i përket shqiptarëve përqindja e emigrimit të tyre në një vend tjetër është më e madhe nga të gjithë popujt tjerë të Ballkanit.
(Kohapress)