Opoja e Komunës së Dragashit (Sharrit), e përbërë prej 18 fshatrash të banuara tërësisht me popullatë shqiptare, ka dhënë persona – intelektualë të shquar dhe në zë, të cilët kanë bërë emër në fusha dhe lëmi të ndryshme profilesh profesionale, ku veprojnë dhe kontribuojnë. Një ndër ta është edhe doktori i shkencave të mjekësisë, Selami Sylejmani.
Dr. sc. Selami Sylejmani u lind në Bresanë të Komunës së Dragashit (Sharrit), më 9 janar të vitit 1954. Shkollën fillore e kreu në vendlindje në vitin 1968. Kisha nderin që të jem mësimdhënës dhe kujdestar i klasës së tij kur ishte nxënës i klasës së tetë të Shkollës Fillore atëherë “29 Nëntori” në Brodosanë, e tani “28 Nëntori” në Bresanë. Shkollën e mesme të mjekësisë e kreu në Prizren në vitin 1972.
Pas kryerjes së shkollës së mesme, regjistrohet në Fakultetin e Mjekësisë të Universitetit të Zagrebit, por për shkak të kushteve të këqija materiale, pas përfundimit të vitit të parë, i ndërprenë studimet dhe për një vit punon teknik medicinal në Spitalin e Përgjithshëm të Prizrenit. Studimet i vazhdon në Fakultetin e Mjekësisë të Universitetit të Prishtinës. Si apsolvent ishte mësimdhënës në Gjimnazin “Jeta e Re” në Suharekë (Therandë).
Fakultetin e Mjekësisë e përfundon më 1 korrik 1980 dhe merr titullin Doktor i mjekësisë. Stazhin e mjekut dhe provimin profesional i kryen në Spitalin e Përgjithshëm të Prizrenit. Ushtron profesionin e mjekut në fillim në Shtëpitë e shëndetit në Suharekë (Therandë) dhe pastaj në Dragash (Sharr), prej nga përjashtohet nga puna dhe burgoset për shkak, siç thuhej atëherë, të “papërshtatshmërisë moralo-politike”, përkatësisht për shkak se kishte përkrahur idenë për Republikën e Kosovës.
Pas përfundimit të burgut, përjashtohet nga Shtëpia e shëndetit në Dragash, për çka detyrohet të kërkojë punë gjetiu, dhe kështu punësohet në fshatin Orllan të Komunës së Podujevës (Besianës). Pas një viti pune në Podujevë, punësohet në Spitalin e Përgjithshëm të Prizrenit, ku edhe i ndahet specializimi nga lëmi i gjinekologjisë me obstetrikë.
Studimet pasuniversitare i kryen me sukses në degën Ultratingulli në Mjekësinë klinike, në Universitetin e Zagrebit, më 1987. Kursin postdiplomik në Qendrën universitare për studime postdiplomike “Erich Saling” në Dubrovnik në vitin 1987. Njëkohësisht e përfundon edhe kursin nga lëmi i aplikimit të Ultratingullit në moshën e fëmijëve në Fakultetin e Mjekësisë të Universitetit të Zagrebit.
Dr. Selami Sylejmani, më 29 shkurt të vitit 1988, përfundon specializimin nga Gjinekologjia me obstetrikë në Universitetin e Zagrebit – Kroaci, në “Klinika za ženske bolesti i porode“. Specializimin e kryen me sukses të shkëlqyeshëm, andaj me atë rast edhe i ofrohet vendi i punës në këtë klinikë.
Në qershor të vitit 1989 e përfundon aftësimin profesional në lëmin e Diagnostikës ultrasonografike në Gjinekologji me obstetrikë në klinikën e njohur të Zagrebit, nën përkujdesjen e ekspertes së njohur të kësaj fushe, prof. dr. Vishnja Latin.
Në qershor të vitit 1995 e përfundon Shkollën e Ultratingullit, organizuar nga Shoqata për zbatimin e ultratingullit në mjekësi, biologji dhe veterinari të Serbisë në Beograd, Shkolla Jugosllave e Ultratingullit në Kragujevac.
Pas përfundimit të specializimit, dr. Selami Sylejmani, punon gjinekolog në ish Qendrën Medicinale “Boro e Ramizi” në Prizren, ku edhe themelon kabinetin për Diagnostikën ultrasonografike në mjekësi, më 23 gusht të vitit 1989. Ky kabinet bëri emër në atë kohë për punën e vet, jo vetëm në Prizren, por edhe në Kosovë e më gjerë. Aty punoi deri më 14 tetor të vitit 1991 kur organi i dhunshëm punë-drejtues e përjashton nga puna.
Paradoksalisht edhe tash, pas 17 vjetësh, vazhdon beteja juridike për njohjen e të gjitha të drejtave të nëpërkëmbura.
Për ta vazhduar punën e tij profesionale, dr. Selami Sylejmani, më 15 tetor të vitit 1981 themelon Ndërmarrjen Shëndetësore “GINEKOS” në Prizren. Kjo ndërmarrje shndërrohet në një vatër të arsimit, dhe mund të thuhet lirisht edhe në një “Nënë Terezë” të dytë për nga aktiviteti humanitar. Deri në vitin 1999, aty mbahet pjesa praktike për studentët e Fakultetit të Mjekësisë të Universitetit të Prishtinës dhe për nxënësit e të gjitha gjeneratave të Shkollës së Mesme të Mjekësisë “Luciano Motroni” në Prizren – drejtimi i Mamive.
Në ordinancën e vet private “GINEKOS”, dr. Selamiu u ofron shërbime mjekësore falas mbi 20.000 pacientëve të kategorive të ndryshme, si psh punëtorëve arsimor, punëtorëve shëndetësor, rasteve sociale, anëtarëve të SHBH “Nëna Terezë”, familjarëve të dëshmorëve, të invalidëve të luftës dhe të martirëve, të zhvendosurve nga Maqedonia dhe Lugina e Preshevës me rastin e luftës, si dhe për shtetasit e Shqipërisë.
Ai për rreth 3 vjet është gjinekolog në Ambulancën humanitare “Nëna Terezë” të Prizrenit, si dhe në atë të Prishtinës. Aty punon deri në rastin e mbylljes së këtyre institucioneve për shkak të rrethanave të luftës.
Dr. Selami Sylejmani, në procesin arsimor punon për një periudhë të gjatë, duke filluar në vitin 1979 në Gjimnazin “Jeta e Re” në Suharekë (Therandë), e më pas në Shkollën e Mesme të Mjekësisë në Prizren. Nga procesi arsimor përjashtohet në vitin 1984 për shkak të “papërshtatshmërisë ideo-politike”. Në vitin 1991 rikthehet në procesin mësimor në Shkollën e Mesme të Mjekësisë “Luciano Motroni” në Prizren, ku punon vullnetarisht pa kompensim material deri në vitin 1999, në prag të luftës në Kosovë.
Pas luftës dr. Selamiu, kthehet në mënyrë vullnetare për të ndihmuar mbarëvajtjen e punës së Qendrës Medicinale të Prizrenit, ku punon për gjashtë muaj.
Titullin Doktor i shkencave mjekësore, Selami Sylejmani e fiton në maj të vitit 2000, pas mbrojtjes publike të disertacionit në Fakultetin e Mjekësisë të Universitetit të Tiranës.
Punën e mësimdhënësit në procesin mësimor në Shkollën e Mesme të Mjekësisë në Prizren e vazhdon edhe për katër vjet të tjera, deri në vitin 2003.
Duke qenë kryetar i Shoqatës së Kosovës për Aplikimin e Ultratingullit në Mjekësi që nga themelimi, në vitin 2001 e deri me rastin e përfundimit të mandatit në vitin 2007, dr. Selami Sylejmani është edhe kryetar i Këshillit organizues të katër simpoziumeve ndërkombëtare me titull: “Ultrasonografia Diagnostike në Mjekësi” në Prizren vitet 2002, 2003, 2005, 2006 dhe “Ultrasonografia Diagnostike në Kardiologji” – Prishtinë, 2002, si dhe kryetar i Kongresit të Parë Ndërkombëtar të Shoqatës së Kosovës për Aplikimin e Ultratingullit në mjekësi KOSOVASON – 2007.
Dr. Selami Sylejmani gjatë karrierës së tij profesionale ka arritur disa përgatitje shkencore shumë të rëndësishme në fushën e mjekësisë.
Gjatë aktivitetit të vet profesional, dr. Selami Sylejmani është anëtar aktiv në disa shoqata profesionale: anëtar i Shoqatës së mjekëve të Kosovës, anëtar i kryesisë së Shoqatës së obstetërve dhe gjinekologëve të Kosovës, anëtar i Shoqatës së mjekëve privat të Kosovës, anëtar i Urdhrit të mjekëve të Shqipërisë, anëtar i Shoqatës së mjekëve të Kroacisë (“Hrvatski Lječnički Zbor“ dhe anëtar i ISUOG-ut (International Society of Ultrasound in Obstetrics and Gynecology).
Veprimtaria e punës profesionale të dr. Selami Sylejmanit shquhet edhe në aktivitetet arsimoro-shkencore: Mësimdhënës në Shkollën e Mesme të Mjekësisë “Luciano Motroni” në Prizren në periudhën 1987-2003; ligjërues në aktivitetet profesionale dhe shkencore të Shoqatës së Mjekëve të Kosovës, dega Prizren në periudhën 1987-2001, Prizren ; ligjërues në “International Center for Education in Ultrasound Diagnostic in Medicine”, në periudhën 2003-2004 – Prizren, Kosovë; ligjërues në “Abdominal and Breast Ultrasound Scanning Workshop”, International Center for Ultrasound Education in Medicine, më 9 qershor 2005 – Prizren, Kosovë; ligjërues në Workshop-in ndërkombëtar: “Bazat e Color Dopplerit në obstetrikë”, më 8 qershor 2006 – Prizren, Kosovë; ligjërues në “One Week Intensive Practical Training Course Ultrasound Gynecology & Obstetrics”, 05-09 nëntor 2006 -Prizren, Kosovë; ligjërues në Konferencën pakistanezo-kosovare: “Pak – Kosova International Ultrasound Conference” – 2007, prej 30 mars deri më 1 prill 2007 – Lahore, Pakistan; ligjërues në Italian – Albanian Seminar for Ultrasound in Albania, 13-15 dhjetor 2007 – Tiranë, Shqipëri; ligjërues në Shkollën pasuniversitare “Ian Donald”, qershor 2008 dhe qershor 2009 – Tiranë, Shqipëri, dhe ligjërues në takimin e gjashtë dhe të shtatë Ulqin – Shkodër, 2007 dhe 2008 – Ulqin, Mali i Zi.
Dr. Selami Sylejmanit për veprimtari profesionale dhe shkencore i janë ndarë një vistër certifikatash si dhe për veprimtarinë e vet të punës së suksesshme është nderuar dhe shpërblyer me një sërë mirënjohjesh dhe falënderimesh: Falënderimin për kontributin e dhënë për mbarëvajtjen e procesit mësimor, nga këshilli i arsimtarëve të SHMT “Gani Çavdërbasha” në Prizren (10 janar 1996); Falënderimin për kontributin e dhënë për mbarëvajtjen e procesit mësimor, nga këshilli i arsimtarëve të Shkollës Fillore “Avdyl Frashëri” në Prizren (10 tetor 1996); Mirënjohjen për veprimtari profesionale – shkencore, nga Shoqata e Mjekëve të Kosovës, Dega në Prizren (25 nëntor 2000); Falënderimin për kontributin e dhënë si ligjërues në Simpoziumin e Dytë Shkencor Ndërkombëtar “Ultrasonografia Diagnostike në Mjekësi – Prizreni 2002”, (14-15 qershor 2002), nga Shoqata e Kosovës për aplikimin e Ultratingullit në mjekësi; Mirënjohjen për kontributin e dhënë për zhvillimin dhe përparimin e mjekësisë në fushën e gjinekologjisë dhe obstetrikës në Kosovë, nga Shoqata e obstetërve dhe gjinekologëve të Kosovës (qershor 2003); Mirënjohjen për kontributin mbi 10-vjeçar për edukimin dhe arsimimin e nxënësve të SHMM “Luciano Motroni”, nga stafi i Shkollës së Mesme të Mjekësisë “Luciano Motroni”, Prizren (7 mars 2005); Letter of Appreciation for the given contribution as lecturer in the Workshop “Abdominal and Breast Ultrasound Scanning” held on 9th of June, 2005, in the Regional Hospital, Prizren, Kosova. International Centre for Ultrasound Education in Medicine “Aloka Kosova”, Prizren; Mirënjohjen për kontribut të jashtëzakonshëm mjekësor humanitar dhe punë të palodhshme profesionale, nga Shoqata e mjekëve, stomatologëve dhe farmacistëve shqiptar të Maqedonisë, (7 qershor 2006); Falënderimin për kontributin e dhënë si ligjërues në Workshop-in “Bazat e Color doppler-it në gjinekologji dhe obstetrikë”, mbajtur më 8 qershor 2006, me rastin e Simpoziumin e Katërt Shkencor Ndërkombëtar “Ultrasonografia Diagnostike në Mjekësi – Prizreni 2006” nga Shoqata e Kosovës për Aplikimin e Ultratingullit në Mjekësi; Falënderimin për kontributin e dhënë si ligjërues në Simpoziumin e Katërt Shkencor Ndërkombëtar “Ultrasonografia Diagnostike në Mjekësi – Prizreni 2006” mbajtur 8-9 qershor 2006, nga Shoqata e Kosovës për Aplikimin e Ultratingullit në Mjekësi; Certificate of Appreciation for conducting one week Intensive Course “Ultrasound in Obstetrics and Gynecology” held from November 5th to November 9th 2006 at Prizren Regional Hospital “Prim. Dr. Daut Mustafa”, Prizren, Kosova. Afro-Asian Institute for Medical Sciences & Kosova Obstetrics and Gynecology Association; Emblema e artë e Institutit Afro-Aziatik të shkencave nga Pak-Kosova International Ultrasound Conference – 2007 (30 mars – 1 prill 2007), Lahore, Pakistan; Mirënjohjen për punën dhe angazhimin e jashtëzakonshëm për themelimin, avancimin dhe promovimin e Shoqatës së Kosovës për aplikimin e Ultratingullit në Mjekësi dhe Diagnostikës Ultrasonografike në mjekësinë kosovare në periudhën gjashtëvjeçare nga Komiteti Shkencor i Kongresit të Parë dhe kryesia e shoqatës (7 qershor 2007), Prizren, Kosovë; Mirënjohjen nga Konferenca e Parë Ndërkombëtare e Mjekësisë Perintale, (22-23 qershor 2007), Tiranë, Shqipëri, dhe Emblemën e artë – Logo e Ian Donald, Shkolla Pasuniversitare e Ekografisë Mjekësore nga kursi i avancuar i Ekografisë në Obstetrikë dhe Gjinekologji, Tiranë (5-6 qershor 2008).
Sh. Hasangjekaj