Treva e krahinës së Plavës dhe Gucisë, ka dhënë ndër shekuj intelektualë dhe figura të ndritura të veprimtarive të ndryshme në fushën e shkencave të teknologjisë, jurisprudencës, ekonomisë, artit, letërsisë, muzikës etj., të cilët kanë bërë emër dhe zë në profesionet e veta dhe kanë dhënë kontribut të paçmuar në punën e tyre. Njëri ndër ta është edhe tani i ndjeri prof. dr. Sherif Kuka, i cili tragjikisht humbi jetën në një aksident të komunikacionit në Prishtinë, në vitin 1982.
Me emrin e prof. dr. Sherif Kukajt lidhet ngusht një ngjarje e madhe shkencore e kohës në Kosovë, themelimi i Institutit Ekonomik në Prishtinë, në vitin 1977, si bërthamë e parë shkencore në fushën e ekonomisë në nivel të Kosovës. Ai ishte drejtori i parë, të cilin e udhëhoqi me sukses deri në vitin 1982, kur tragjikisht humbi jetën. Gjatë këtyre viteve, nën mbikëqyrjen e tij, Instituti Ekonomik dha një kontribut të veçantë në hartimin e studimeve, strategjive dhe koncepteve shkencore për zhvillimin ekonomik dhe shoqëror në Kosovë
“Kaluan 38 vite nga dhjetori i vitit 1982, kur në një aksident komunikacioni humbi jetën tragjikisht profesori shumëvjeçar në Fakultetin Ekonomik të Universitetit të Prishtinës, ndër doktorët e parë të ekonomisë në Kosovë. Shtypi i kohës, vdekjen e shkencëtarit dhe profesorit të shquar, Sherif Kuka, e kishte cilësuar humbje të madhe për shkencën dhe botën intelektuale në rrafshin kombëtar”, shkruan në faqen e portalit “Plava e Gucia Sot”, drejtori dhe pronari i tij, Esad Gjonbalaj.
Sherif Kuka u lind në vitin 1937, në lagjen Kukaj të fshatit Krushevë, Komuna e Gucisë. Shkollën fillore e kreu në vendlindje, kurse të mesmen në Prishtinë. Në vitin 1962 u regjistrua në Fakultetin e Ekonomisë në Prishtinë, të cilin e kreu me sukses të dalluar në vitin 1966. Studimet pasuniversitare dhe të doktoratës i përfundon me sukses të lartë në Fakultetin Ekonomik të Zagrebit. Tezën e magjistraturës me titull “Modeli gjeneral i transportit dhe distribuimit” e mbrojti në vitin 1971, kurse tezën e doktoratës me titull “Aplikimi i metodave të kërkimit operacional në ndërmarrjet e komunikacionit” e mbrojti në vitin 1975, duke marrë gradën shkencore Doktor i ekonomisë.
Veprimtaria krijuese e prof. dr. Sherif Kukajt shtrihet në shumë fusha të interesimit shkencor, por veçanërisht më i fokusuar në analiza kuantitative dhe politika publike të zhvillimit ekonomik. Falë punës dhe suksesit të lartë të arritur në studime, Sherif Kuka fillimisht zgjidhet asistent dhe nga viti 1975 profesor i rregullt për lëndën Kërkimet operacionale, në Fakultetin Ekonomik të Universitetit të Prishtinës.
Karriera e tij shkencore vlerësohet e bujshme dhe mjaft cilësore. Shkrimet e tij i përshkon vlerësimi i lartë shkencor, por vdekja e pamëshirshme në hovin dhe vrullin më të madh të veprimtarisë së tij i shkëputi përgjithmonë aktivitetet e tij profesionale. Profesori, tani i ndjerë, la të botuara 31 punime shkencore në revista prestigjioze të kohës, si dhe tekstin e parë universitar në hapësirën e gjithë trojeve shqiptare me titull “Kërkime operacionale”, dedikuar studentëve të ekonomisë.
Emri i prof. dr. Sherif Kukajt do të qëndrojë pa dyshim një kohë të gjatë në krye të listës së emrave të denjë dhe të shquar të shkencës së ekonomisë. Puna e tij e paepur vlerësohej dhe respektohej në pafundësi nga studentët për kontributin e tij të madh në ngritjen e kuadrit të ekonomisë dhe të gjeneratave të shumta të profesorëve të ardhshëm në Universitetin e Prishtinës dhe më gjerë.
Karriera e tij shkencore vlerësohet e bujshme dhe mjaft cilësore. Shkrimet e tij i përshkon vlerësimi i lartë shkencor, por vdekja e pamëshirshme në hovin dhe vrullin më të madh të veprimtarisë së tij i shkëputi përgjithmonë aktivitetet e tij profesionale. Profesori, tani i ndjerë, la të botuara 31 punime shkencore në revista prestigjioze të kohës, si dhe tekstin e parë universitar në hapësirën e gjithë trojeve shqiptare me titull “Kërkime operacionale”, dedikuar studentëve të ekonomisë
Me emrin e prof. dr. Sherif Kukajt lidhet ngusht një ngjarje e madhe shkencore e kohës në Kosovë, themelimi i Institutit Ekonomik në Prishtinë, në vitin 1977, si bërthamë e parë shkencore në fushën e ekonomisë në nivel të Kosovës. Ai ishte drejtori i parë të cilin e udhëhoqi me sukses deri në vitin 1982, kur tragjikisht humbi jetën. Gjatë këtyre viteve, nën mbikëqyrjen e tij, Instituti Ekonomik dha një kontribut të veçantë në hartimin e studimeve, të strategjive dhe koncepteve shkencore për zhvillimin ekonomik dhe shoqëror në Kosovë.
Prof. dr. Sherif Kuka ishte njëri ndër themeluesit e revistës së parë shkencore në fushën e ekonomisë “ECONOMIA”. Në këtë revistë, gjatë shumë viteve punimet e veta shkencore i botuan studiuesit dhe krijuesit më eminentë të fushës së ekonomisë nga Kosova dhe më gjerë.
Falë punës dhe kreativitetit të tij shkencor, prof. dr. Sherif Kuka ia del të anëtarësojë Institutin Ekonomik të Prishtinës si njësi të barabartë shkencore të Konsorciumit të instituteve të ekonomisë të republikave në ish-Jugosllavi. Duke qenë pjesëmarrës në shumë konferenca, tribuna dhe debate shkencore në Kosovë dhe jashtë saj, profesor Kuka arrin të argumentojë dhe artikulojë qartë interesat strategjike dhe afatgjate të zhvillimit ekonomik në Kosovë. Konceptet dhe vizioni i tij janë një udhërrëfyes për të tashmen dhe të ardhmen e ekonomisë kombëtare, në rrugëtimin e gjatë e të vështirë drejt integrimit në ekonomitë e mëdha evropiane.
Në fund, me plot gojë mund të themi, por edhe të konstatojmë, se emri i prof. dr. Sherif Kukajt sublimon në vete një figurë eminente të shkencës së ekonomisë dhe intelektualit të përmasave kombëtare dhe si i tillë përjetë ai do të mbetet shembull dhe idhull i punës kreative, i virtyteve dhe i vizionit të gjerë dhe shumëpërfshirës për gjenerata të tëra.