Shkrimtari dhe dramaturgu i njohur shkodran, Fadil Kraja, me origjinë nga Kraja, ka vdekur të enjten.
Ai ka lindur në qytetin e Shkodrës, në vitin 1931, në një familje patriotike e arsimdashëse. Nëna e tij, e njohur si Hajrije hanëmi, ishte mësuese e shkollave të para publike në këtë qytet, duke thyer një tabu e duke i hapur rrugë emancipimit femëror.
Shkollën e mesme e kreu në gjimnazin e Shkodrës, ku spikati me talentin për letërsinë. Studimet e larta i përfundoi në degën Gjuhë-Letërsi shqipe, Fakulteti i Filologjisë – Universiteti i Tiranës. Pas diplomimit punoi ne profesionin e mësuesit, të cilin e trashëgonte edhe nga familja e tij. Ai filloi punë si mësues në fshatrat e rrethinave të Shkodrës, për ta vazhduar në gjimnazin e qytetit dhe për ta mbyllur si pedagog i letërsisë së huaj në Universitetin “Luigj Gurakuqi” të Shkodrës e si shkrimtar në profesion të lirë (1972-1992), njëkohësisht kryetar i Degës së Lidhjes së Shkrimtarëve dhe Artistëve – Shkodër. Në ndërkohë drejtoi rrethin e letrarëve të rinj në Klubin e Rinisë “Heronjtë e Vigut”, nis të botojë në shtypin letrar të kohës, më pas vëllime poetike, madje me librin e parë “Kënga ime” fitoi Çmimin e Parë në Konkursin Kombëtar të 10-vjetorit të çlirimit të Atdheut, në vitin 1954.
Krijimtaria dhe emri i tij lidhen ngusht me Teatrin Kombëtar Shqiptar dhe Teatrin “Migjeni” të Shkodrës, ku në këtë të fundit kontribuoi për 60 vjet. Veprat e tij janë luajtur edhe nga trupat teatrale të Kosovës, por edhe të diasporës e të qyteteve të ndryshme në Shqipëri.
Fadil Kraja ka lënë trashëgim një pasuri të madhe në fushën e letërsisë, e cila përbëhet nga dhjetëra përmbledhje me poezi dhe tregime, romane, drama, komedi etj. Është autor i vëllimeve poetike: “Kënga ime”, “Melodi malësore”, “Jehona malesh”; përmbledhjeve me tregime: “Kandidatja e fundit”, “Ndodhitë e Nereidës”, “Fajin e kishte Besa”; romaneve: “Britma e një gruaje”, “Pengu i diellit”, “Balada e nënës”. Ai ka shkruar mbi 50 drama dhe komedi, mes të cilave: “Fisheku në pajë”, që vetëm në Shkodër u shfaq rreth 500 herë, “Sinjalet e natës”, “Shpartallimi”, “Baca i Gjetajve”, “Gjaku i Arbërit”, “Djem të mbarë”, “Çështja e Blertës”, “Flamur në dasmë”, “Rozafa”, “Kur flasin zemrat”, “Luani i shtëpisë”, “Çështje familjare”, “Njerëz të ditëve tona”, “Mos më shkim hisen e diellit”, “Jorgani”, “Ditari i një mësuesi”, “Dopio gjashta”, “Dy jetë”, “Midis dy dhimbjeve”, “Surpriza”, “Martesë me internet”, “Nata e fundit”, si dhe shumë drama për fëmijë, skenare filmash, librete operash dhe operetash.
Për punën dhe veprimtarinë e tij në fushën letrare është nderuar me titujt “Kalorës i Urdhrit së Skënderbeut”, “Mjeshtër i Madh”, “ Krenaria e Qytetit” etj.
Fadil Kraja kishte një dashuri të theksuar për vendlindjen e paraardhësve të tij. Pas vitit 1990, me hapjen e kufirit ndërmjet Shqipërisë dhe Malit të Zi, ka qenë shpesh pjesëmarrës në aktivitete të ndryshme në Krajë, Ulqin, Anë të Malit dhe në përgjithësi te shqiptarët në Malin e Zi.
Homazhet për këtë figurë të shquar u zhvilluan të premten paradreke, në hollin e Teatrit “Migjeni”, me pjesëmarrjen e një numri të madh të qytetarëve të cilët i dhanë lamtumirën e fundit. U varros të premten në Shkodër.
(Kohapress)