Fshati Vuthaj i Komunës së Gucisë, dikur ishte njëri ndër vendbanimet më të mëdha të Komunës së Plavës me mbi 200 familje me më se 1.200 banorë tërësisht të popullatës shqiptare. Është fshat piktoresk përballë Alpeve Shqiptare, e rrëzë bjeshkëve të larta me pyje e kreshta. Por gjithsesi, fshati Vuthaj më tepër veçohet, njihet e përmendet si vatër e shumë ngjarjeve dhe ndodhive historike. Mirëpo ajo që më së shumti e karakterizon dhe bën të zëshëm dhe më të theksuar atë, është e dhëna se fshati Vuthaj është truall burimi i një plejade intelektualësh shqiptarë profilesh të ndryshme profesionale. Njëri ndër ta ishte edhe tani i ndjeri juristi i diplomuar Enver Adem Dedushaj, i cili papritmas ndërroi jetë më 7 nëntor 2022, si pasojë e sulmit kardiovaskular në moshën 63 vjeçare.
U lind në fshatin Vuthaj të Komunës së Gucisë, më 24 tetor të vitit 1960, nga prindërit Cymë dhe Adem Halili Dedushaj, në një familje tipike tradicionale shqiptare, me veti dhe tipare atdhedashëse patriotike, mikpritëse e bujare. Në familje shumanëtarëshe ku prindërit Ademi dhe Cyma rrisnin pesë djem, Enveri ishte djali i dytë me radhë i familjes. I rrisnin në kushte të vështira ekonomiko-sociale, të cilat aso kohe si shumica e familjeve të kësaj ane, mbijetonin me bujqësi dhe blegtori.
Enver Adem Dedushaj shkollimin fillor katërklasësh (I-IV) e ka kryer në vendlindje në fshatin Vuthaj, ndërsa katër klasët e ciklit të lartë (V-VIII), i ka kryer në Shkollën Fillore tetëvjeçare “Xhafer Nikoçeviq” në Guci. Bashkë me shumë shokë dhe shoqe të asaj kohe, ka udhëtuar në këmbë çdo ditë nga 10 kilometra, me veshmbathje jo të mira e shpesh edhe të uritur. Shkollën fillore e ka kryer në vitin 1975. Ndonëse në atë kohë në Plavë dhe Guci nuk kishte shkollë të mesme me mësim në gjuhën shqipe, Enveri vazhdon shkollimin në Shkollën e Mesme Ekonomike në Pejë, si shumë nxënës të kësaj ane të cilën e kryen në vitin 1979.
Ndarja e hershme nga familja në moshën 15 vjeçare, kushtet e vështira ekonomiko-sociale të kohës, adaptimi në jetën e qytetit, ishin sfida të cilat jo lehtë u përballuan. Gjatë periudhës katërvjeçare kohore sa ishte nxënës i shkollës së mesme në Pejë, Enveri me ca moshatar vuthjanë, kanë ndërruar shumë shtëpi e besa edhe bodrume të këtij qyteti, shumicën e dimrave pa ngrohje e shpeshherë edhe me bark të uritur. Pas kryerjes së shkollës së mesme dërgohet në shërbimin ushtarak të cilin e kryen brenda një viti. Pas kthimit nga shërbimi ushtarak regjistrohet si student me korrespondencë në Fakultetin Juridik në Prishtinë, meqenëse kushtet ekonomike në familjen shumanëtarëshe nuk ia mundësonin studimet si student i rregullt edhe përkundër dëshirës dhe vullnetit të flakët për zgjerimin dhe përsosjen e dritës dhe dijes në veprimtarinë e profesionit të zgjedhur.
Gjatë kohës së studimeve me korrespondencë në Fakultetin Juridik të Prishtinës, Enveri me përkushtim përgatiste provimet, por edhe kryente punë të ndryshme sezonale jashtë profesionit. Kështu në muajt e verës të viteve 1982, 1983 dhe 1985, gjatë sezonit ishte i punësuar në Ndërmarrjen e Ujësjellësit “Bistrica” ne Bijello Pole, për të krijuar kushte materiale për kryerjen e fakultetit. Pas përfundimit të studimeve në afat të rregullt në vitin akademik 1986/87, Enveri në vendlindje në Vuthaj me përkushtim u qaset punëve të ndryshme të fshatit, kryesisht blegtorale e bujqësore të cilat i kryen me përpikëri.
Më 3 maj të vitit 1989, Enveri fillon punën si praktikant në Gjykatën Themelore në Plavë me plot entuziazëm dhe vullnet, duke u pajisur me dije dhe përvojë në profesionin e vet deri më 31 maj 1991.
Në vitin 1992 ashtu sikurse një numër i konsiderueshëm i të rinjve të kësaj ane, edhe Enveri me familje të ngushtë (bashkëshorten e djalin) ia mësyn gyrbetit, shkon në Austri për të krijuar kushte jetësore për familje dhe për t’u kthyer sa më parë që është e mundur në vendlindje në Vuthaj. Pas qëndrimit tri vjetësh në Austri ia arrin qëllimit dhe kthehet në Vuthaj, për ta vazhduar jetën në mesin e kushërinjve e vëllazërisë Dedushaj dhe bashkëvendësve vuthjanë, por gjithsesi në profesionin e vet.
Pas një periudhe të gjatë kohore, i pa punësuar në profesion, më 5 maj 1998 inkuadrohet në administratën e përgjithshme të Komunës së Plavës, kryeshef i së cilës ishte për një kohë. Në mandat katërvjeçar ishte edhe shef i Shërbimit të financave të komunës, ndërsa një mandat e gjysmë (rreth 6 vjet) ushtroi detyrën në postin e sekretarit të Kuvendit të Komunës së Plavës, deri më 1 shtator 2014 – deri në pavarësimin e Komunës së Gucisë. Që nga kthimi i statusit të pavarësisë së Komunës së Gucisë dhe formimit të Kuvendit të komunës së saj në shtator të vitit 2014 e gjithnjë deri në vdekjen e tij më 7 nëntor 2022, Enveri me përkushtim ushtroi detyrën në postin e sekretarit të Kuvendit të komunës. Gjatë gjithë kohës në këtë detyrë Enveri dha vërtetë kontribut të madh në punën e shërbimeve të administratës së përgjithshme të komunës, e në veçanti në përgatitjen e materialeve kuvendore në gjuhën shqipe.
Enver Adem Dedushaj ishte edhe aktivist i denjë dhe i paepur i qarqeve politike që nga fillimi i pluralizmit (sistemit shumëpartiak). Në fillim anëtar dhe aktivist i shquar i LD në MZ, e pastaj në UDSH. Që nga themelimi i degës së UDSH-së në Plavë-Guci në vitin 1996, Enveri ishte anëtar i kryesisë së saj, duke dhënë kontribut të pazëvendësueshëm në këtë subjekt politik, i cili ishte themeluar me të vetmin qëllim për faktorizimin dhe avancimin e të drejtave të shqiptarëve edhe në trevën e Plavës dhe Gucisë.
Angazhimi dhe vullneti i tij politik në kuadër të degës së UDSH-së do të reflektohet shpejt edhe në nivel qendror të UDSH-së si subjekti më i madhp olitik shqiptar në nivel të Malit të Zi, ku në vitin 1998 Enveri emërohet anëtar i Këshillit qendror të UDSH-së dhe nënkryetar i partisë në nivelin e Malit të Zi pran këtij subjekti, gjithnjë deri në vdekjen e tij.
Që nga viti 2018 e këndej Enveri ishte edhe kryetar i degës së UDSH-së në Guci.
Pa ngurrim dhe me plot gojë konfirmoj se Enver Adem Dedushaj vërtetë ka qenë njeri i kohës, profesionist i rryer, aktivist shumëdimensional, i denjë dhe i paepur, misionar dhe vizionar i veprimtarisë së vet intelektuale, familjar i përkryer, shok, mik dhe bashkëvendës i nderuar dhe i respektuar.
Vdekja e tij e hershme dhe e papritur shkaktoi dhembje dhe varrë të rënda ndër të gjithë ata që e kanë njohur, që kanë punuar dhe janë shoqëruar me të. Familja ka humbur kryefamiljarin – shtyllën e shtëpisë, vëllazëria Dedushaj vëllain dhe këshillëdhënësin e denjë, vuthjanët bashkëvendësin e respektuar, Komuna e Gucisë, por edhe ajo e Plavës profesionistin, kolegun dhe mikun e çmuar dhe shumë të nderuar e të vlerësuar.
Enver Adem Dedushaj u varros më 9 nëntor 2022në varrezat e vendlindjes në Vuthaj me nderimet më të larta. Turma e të pranishmëve në Shtëpinë e Kulturës në Vuthaj dhe në përcjelljen e tij në shtëpinë e përmotshme, dëshmoi se kush ka qenë Enver Dedushaj. Prania e tyre tregoi respektin që ai ka pasur kudo.
Enveri pas vetes la bashkëshorten Arbnoren, djemtë Besfortin e Donatin dhe vajzën Arbelinën.