Të hënën, më 20 shtator 2021, në moshën 79-vjeçare vdiq mësuesi, arsimtari e pedagogu Kasem Ceka.
Ai u lind në fshatin Brajshë, më 17 maj 1942. Shkollën fillore tetëklasëshe e ka kryer në Katërkollë, në vitin shkollor 1957/1958. Pas kryerjes së klasës së tetë, u regjistrua në Shkollën Normale në Prishtinë, të cilën e kreu me sukses në vitin shkollor 1962/1963. Në shtator të vitit 1963 filloi punën në Shkollën Fillore në Katërkollë, por për shkak të thirrjes për të kryer shërbimin ushtarak do të shkëputet për një vit e gjysmë nga procesi mësimor. Do të rikthehet në vendin e punës në prill të vitit 1965 duke punuar pa ndërprerje deri në daljen në pension në fund të vitit shkollor 2005. Krahas punës, ka vijuar me korrespondencë studimet për Histori-Gjeografi, të cilat i kreu me sukses dhe në afat.
Mësues Kasemi, siç e quanin të gjithë, nuk u mjaftua vetëm me punën si mësimdhënës. Falë bashkëpunimit me nxënës dhe prindërit e tyre, në kuadër të aktiviteteve të lira dhe mësimit shtesë, ai e pajisi kabinetin e historisë me objekte të ndryshme të trashëgimisë historike e kulturore duke e shndërruar në një muze të vogël historik e etnografik të trevës së Anës së Malit. Falë punës së tij nxënësit morën pjesë në konkurse të ndryshme të historisë duke fituar mirënjohje e fletëfalënderime të shumta.
Si mësimdhënës i dalluar dhe punëtor, ai ushtroi detyra me rëndësi duke u zgjedhur kryetar i Këshillit të Shkollës, në komisione të ndryshme, ndërsa gjashtë vite e ka ushtruar detyrën e ndihmësdrejtorit të Shkollës Fillore “Bedri Elezaga” në Katërkollë.
Ai po ashtu ka qenë i angazhuar si aktivist në veprimtari të ndryshme shoqërore-politike, duke mbuluar pozita në fusha të ndryshme nga viti 1969 deri në vitin 1981. Kështu është zgjedhur anëtar i Sekretariatit të Konferencës Komunale të Lidhjes Komuniste – Ulqin dhe anëtar i Konferencës së LK të Malit të Zi, nënkryetar i Shoqërisë “Auto Moto” në Ulqin, anëtar i Shtabit të Mbrojtjes Territoriale, anëtar i Këshillit të Bashkësisë Lokale Katërkollë dhe kryetar i saj për afro dhjetë vjet, deri në vitin 1981.
Ngjarjet e vitit 1981 dhe procesi i diferencimit, ku në shënjestër ishin sidomos punonjësit e arsimit, patën pasoja edhe tek ai. Kështu ai do të akuzohej si oportunist, irredentist dhe nacionalist, duke u dënuar me vërejtje partiake dhe largim nga të gjitha pozitat dhe përgjegjësitë.
Ja si e përshkruan punën e Kasem Cekës në monografinë “Arsimi shqip në Anë të Malit 1945-1985” autorja Syme Kokaj, mësimdhënëse e gjuhës dhe letërsisë shqipe, njëherazi kolege e tij: “Puna shumëvjeçare e Kasem Cekës si pedagog e mësues është për t’u çmuar e lavdëruar, jo vetëm nga nxënësit e tij, por edhe nga kolegët, prindërit dhe në përgjithësi nga anamalasit. Të rrallë janë pedagogët si Kasemi, edhe punëtor i palodhur, i ndërgjegjshëm e tolerues, por edhe përgjegjës për çdo veprimtari”.
Kasem Ceka ishte një mësimdhënës me vlera të rralla, i përkushtuar ndaj punës në arsim, edukimit të brezave të rinj me virtyte e vlera morale e njerëzore. Ai ishte shumë i afërt me nxënësit, sepse dinte t’u përshtatej atyre. Ajo që e karakterizonte, përpos pasionit për punën, ishte edhe humori që bënte për vete këdo, pavarësisht moshës. Ai po ashtu posedonte një oratori mbresëlënëse.
U varros në vendlindjen e tij në Brajshë, të hënën, më 20 shtator 2021.
(Kohapress)