Sllovenia shkruan historinë e re pasi që prek për herë të parë majat e Evropës. Ajo erdhi në finalen e parë në historinë e saj pasi i kishte fituar të tetë ndeshjet që ka zhvilluar në këtë kampionat evropian, përfshirë edhe deklasimin në gjysmëfinale të Spanjës, kampiones në fuqi
Sllovenia është kurorëzuar të dielën në mbrëmje “Kampione e Evropës” në basketboll për meshkuj, pasi ka triumfuar në finale ndaj Serbisë. Ka qenë një derbi ballkanik kjo finale, pasi dy përfaqësueset e një shkolle të jashtëzakonshme basketbolli, siç ishte ajo jugosllave, kanë “përplasur brirët” në betejën për të bërë të tyren kurorën e kampiones së Evropës.
Përkundër pritshmërive, Sllovenia erdhi në finalen e parë në historinë e saj pasi i kishte fituar të tetë ndeshjet që ka zhvilluar në këtë kampionat evropian. Nga ana tjetër, Serbia, në rrugën e saj deri në finale ksihte humbur vetëm një ndeshje në grup nga Rusia, të cilën më pas e mposhti në gjysmëfinale.
Në ndeshjen finale e cila u luajt në Stamboll të Turqisë, Sllovenia shkeli Serbinë me rezultatin 93-85, në një finale tejet dramatike, ku sllovenët treguan lojë jashtëzakonisht të mirë. Fillimi i ndeshjes i takoi skuadrës serbe, por më pas lojën nën kontroll e morën sllovenët dhe falë njeriut të ndeshjes, Dragiq, i cili vetëm në pjesën e parë realizoi 26 pikë, Sllovenia në pushim shkoi më epërsinë prej nëntë pikëve (56-47).
Lojë dramatike është luajtur edhe në pjesën e dytë. Serbia në periudhën e tretë ia doli ta ngushtojë avantazhin e sllovenëve në vetëm dy pikë, 63-61, duke shfrytëzuar largimin nga loja te Luka Donçiqit, i cili u lëndua. Megjithatë, Sllovenia e ruajti epërsinë dhe këtë çerek e mbylli me katër pikë epërsi, 71-67.
E në dhjetëminutëshin e fundit, sllovenët ranë dukshëm në lojën e tyre, të cilën mjaft mirë e shfrytëzuan basketbollistët e skuadrës serbe, duke shkrirë avantazhin e sllovenëve. Megjithatë, në fund të ndeshjes, ekipi slloven dha gjithçka nga vetja dhe në fund iu gëzua fitores me rezultat 93-85.
Përpos yllit të Majamit, Goran Dragiq, autor i 35 pikëve dhe i një ndeshjeje ku dha edhe shpirtin, vendimtare për skuadrën sllovene që drejtohet nga trajneri serb Igor Kokoshkov, ka qenë loja e lojtarëve “të dytë” më të rëndësishëm, si Prepeliç e Randolf, pasi një tjetër yll në rritje, 18-vjeçari Lluka Donçiç u dëmtua në kavilje.
Në këtë mënyrë Sllovenia shkruan historinë e re pasi që prek për herë të parë majat e Evropës, kurse Serbia dhe trajneri i saj Aleksandar Gjorgjeviq kanë dështuar në përpjekjen e tretë në një finale.
Me medalje të bronztë u kurorëzua tashmë ish-kampionia evropiane, Spanja, e cila në ndeshjen për vendin e tretë fitoi ndaj Rusisë me rezultatin 93:85.
Goran Dragiqi i Sllovenisë, i cili udhëhoqi këtë skuadër drejt triumfit historik, është shpallur basketbollisti më i mirë i Kampionatit Evropian 2017. Ai u përfshi në top-pesëshen bashkë me Aleksei Shvedin e Rusisë, Bogdan Bogdanoviqin e Serbisë, Lluka Donçiqin e Sllovenisë dhe Paul Gasolin e Spanjës, i cili theu në këtë evropian edhe rekordin e pikëve të shënuara në vite, duke arritur shifrën 1123 pikë, e duke qenë “mbreti” i pikëve në Evropë.
Kampionati i sivjetshëm Evropian në basketboll u zhvillua në katër vende nikoqire: Turqi, Finlandë, Izrael dhe Rumani.
(Kohapress)