Mali i Zi është kualifikuar në Kampionatin Botëror të hendbollit që mbahet vitin e ardhshëm. Në duelin vendimtar për Botëror, Mali i Zi fitoi kundër Greqisë të dielën mbrëma me rezultatin 33:25, në sallën e stërmbushur në Podgoricë dhe kështu siguroi biletën për Botëror. Në ndeshjen e parë, më 13 prill, Greqia kishte fituar 25:23.
Ndeshja ishte e fortë, por vendasit të nxitur nga rreth 6 000 shikues, kanë shfaqur më shumë dhe në fund realizuan synimin. Pas ndeshjes ka pasur festë të madhe në palestër.
Mali i Zi është kundërshtar i Kombëtares së Kosovës në eliminatoret për Euro 2024 dhe ishte kundërshtar në kualifikimet për Evropianin e kaluar.
Krahas Malit të Zi, të dielën biletën për në Botëror e siguruan edhe Maqedonia e Veriut, që fitoi 27:25 ndaj Çekisë, pas barazimit 24:24 në ndeshjen e parë. Portugalia fitoi 35:28 ndaj Holandës në fushën kundërshtare, ndonëse e kishte humbur 33:30 ndeshjen e parë në shtëpi.
Suedia, Polonia, Danimarka, Spanja, Franca, Norvegjia, Belgjika, Hungaria, Kroacia, Islanda, Serbia, Gjermania, Portugalia, Mali i Zi dhe Maqedonia e Veriut janë kombëtaret nga Evropa që janë kualifikuar në Kampionatin Botëror që do të mbahet nga 11 deri më 29 janar të vitit të ardhshëm në Poloni dhe Suedi.
(Kohapress)