Sporti sjell përfitime të shumëfishta për organizmin e njeriut

Të merresh me sport, cilido lloj që të jetë ai pa dyshim që do të kemi përfitime të shumëfishta në organizmin tonë – kështu tregojnë studimet e ndryshme, organizatat e shëndetësisë dhe mjekët. Ata përherë, ose kurdoherë që ju jepet rasti, apelojnë pa reshtur që të merremi me sport sa më shumë që të jetë e mundur, në veçanti, ata potencojnë të mirat që i sjell të ecurit në natyrë

Toni Ujkaj

Në jetën e përditshme jo rrallëherë kemi dëgjuar njerëz të grup-moshave të ndryshme teksa thonë: të ecësh çdo ditë, është gjeja më e mirë dhe më efikase për shëndetin e njeriut; të ecësh çdo ditë, do të thotë të kesh një jetë në tërësi më të shëndetshme dhe mund të jesh më pak i ekspozuar ndaj sëmundjeve eventuale. Në disa vende të botës, po të shikosh mënyrën e të jetuarit, dinamikën e jetës e cila është e ngarkuar nga stresi pothuajse në çdo sferë të jetës, rezulton se në ato vende për fat të keq këto fenomene janë të pranishme siç është stresi në punë apo ajri i ndotur, etj, ka më shumë humbje në njerëz për shkak të fenomeneve negative të pranishme dhe të përditshme, për shkak të qëndrimit larg sportit, pra për shkak të një stili pasiv të të jetuarit.