Donald Trump e filloi mandatin e tij të dytë në detyrë me qëllimin për të sjellë një Epokë të Artë të re për Amerikën. Prandaj, ai dhe Sekretari i Shtetit Marco Rubio kanë përsëritur se gjithçka që bëjmë, çdo dollar që shpenzojmë duhet të ndihmojë për t’i bërë Shtetet e Bashkuara më të sigurta, më të forta dhe më të begata. Ndërprerja e imigracionit të paligjshëm ishte një nga platformat kryesore për të cilat qytetarët amerikanë zgjodhën Presidentin Trump dhe unë do të doja të ndaja disa informacione rreth politikës së imigracionit të SHBA-së.
Mesazhi është i qartë: nëse përpiqeni të hyni në Shtetet e Bashkuara në mënyrë të paligjshme, gënjeni për të marrë një vizë, punoni pa leje ligjore, ose qëndroni në Shtetet e Bashkuara pasi të ketë skaduar viza juaj ose periudha e heqjes së vizës, do të përballeni me ndëshkime serioze. Këto përfshijnë kohë në burg, deportim dhe ndalim të përhershëm për të marrë një vizë të SHBA-së në të ardhmen. Prandaj, nëse keni familjarë ose miq që janë në Shtetet e Bashkuara në mënyrë të paligjshme, tani është koha për t’u thënë atyre të kthehen në shtëpi.
Nëse përpiqeni që të hyni ose qëndroni në mënyrë të paligjshme do të kapeni
Fatkeqësisht, disa njerëz besojnë se mund të futen fshehurazi në Shtetet e Bashkuara dhe të shmangin kapjen. Kjo nuk është e vërtetë. Administrata Trump ka forcuar sigurinë kufitare dhe ka rritur ndjeshëm numrin e të huajve të paligjshëm që arrestohen dhe deportohen.
Në shkurt 2025, kalimet e paligjshme të kufirit ranë me 94% krahasuar me shkurtin 2024, ndërsa arrestimet e kalimtarëve të paligjshëm brenda Shteteve të Bashkuara u rritën me 627%. Thjesht, nëse përpiqeni të kaloni një kufi të SHBA-së ose të qëndroni në Shtetet e Bashkuara në mënyrë të paligjshme, do të kapeni, do të ndaloheni dhe do të dërgoheni mbrapa. Juve gjithashtu mund t’ju ndalohet për të mos u kthyer kurrë më ose të përballeni me gjoba dhe padi penale.
Mashtrimi me vizën e SHBA-së ka pasoja serioze
Procesi i vizës së SHBA-së është më i sigurti në botë. Megjithatë, disa njerëz ende përpiqen të mashtrojnë sistemin duke përdorur dokumente të rreme, duke gënjyer në aplikime, ose duke qëndruar pasi të ketë skaduar viza e tyre. Në fakt, shumë udhëtarë malazezë në SHBA kanë qëndruar më gjatë se viza e tyre ose kanë shkelur kushtet e vizës së tyre duke punuar në mënyrë të paligjshme. Këto janë shembuj të mashtrimit me vizën dhe është një krim serioz. Nëse e shkelni ligjin në këtë mënyrë, do të ndëshkoheni dhe mund të mos u lejohet kurrë të hyni përsëri në Shtetet e Bashkuara.
Udhëtimi deri në kufirin e SHBA-së është i rrezikshëm
Udhëtarët nga Ballkani janë të njohur për përpjekjet e tyre për të kaluar në mënyrë të paligjshme në Shtetet e Bashkuara me rrezik të madh. Kuptoni se siguria juaj – dhe madje edhe jeta juaj – janë në rrezik. Grupet kriminale, kartelet dhe trafikantët e njerëzve synojnë migrantët e paligjshëm, duke i nënshtruar ata ndaj dhunës, zhvatjes dhe sulmeve. Shumë prej atyre që përpiqen të bëjnë udhëtimin nuk arrijnë kurrë në destinacionin e tyre.
Shtetet e Bashkuara po punojnë me vende të tjera në hemisferën perëndimore për të ndaluar dhe kthyer njerëzit që përpiqen të hyjnë në mënyrë të paligjshme para se të arrijnë në kufirin e SHBA-së. Duke i siguruar kufijtë tanë, ne jo vetëm që mbrojmë qytetarët amerikanë, por gjithashtu parandalojmë vuajtjet e shkaktuara nga imigracioni i paligjshëm.
Presidenti Trump po mban të gjithë përgjegjës
Qeveria e Shteteve të Bashkuara po ndërmerr gjithashtu veprime kundër atyre që ndihmojnë të tjerët të hyjnë në vend në mënyrë të paligjshme. Kjo përfshin kontrabandistët, trafikantët e njerëzve, prodhuesit e dokumenteve të rreme dhe madje edhe zyrtarët e qeverive të huaja që lejojnë vazhdimin e imigracionit të paligjshëm.
Kohët e fundit, Sekretari i Shtetit Marco Rubio njoftoi një politikë të re të kufizimit të vizave për zyrtarët e huaj – përfshirë stafin e imigracionit, doganave dhe autoriteteve portuale – që nuk ndihmojnë në ndalimin e imigracionit të paligjshëm. Kjo ndërtohet mbi kufizime të ngjashme ekzistuese për ata në industrinë e transportit dhe turizmit. Ata që kërcënojnë sigurinë e SHBA-së duke lehtësuar imigracionin e paligjshëm nuk janë të mirëpritur në vendin tonë.
Zgjedhja është e qartë – ndiqni ligjin
Rreziqet e përpjekjes për të emigruar në mënyrë të paligjshme në Shtetet e Bashkuara tejkalojnë çdo përfitim të mundshëm. Hyrja e paligjshme shkel ligjet e SHBA-së, vë në rrezik sigurinë dhe mirëqenien tuaj dhe dëmton të ardhmen tuaj dhe të ardhmen e familjes suaj. Ndëshkimet janë serioze: kohë në burg, ndarje nga familja juaj dhe ndalime të përhershme për të hyrë përsëri në Shtetet e Bashkuara.
Dhe, nëse njihni dikë që është në Shtetet e Bashkuara në mënyrë të paligjshme, gjëja më e mirë që mund të bëni për ta është t’i inkurajoni të largohen tani para se të kapen. Për të gjithë, mesazhi është i thjeshtë: Bëni zgjedhjen e duhur, ndiqni ligjin dhe mos rrezikoni sigurinë, familjen ose të ardhmen tuaj.