Xhirimet interesante, ku spikaten në mënyrën më të bukur të mundshme bukuritë e paprekura natyrore të Malit të Zi, të cilat në radhë të parë vërehen në peizazhet e Adës në Bunë, Plazhit të Madh, Liqenit të Shkodrës dhe Kalasë së Ulqint. I gjithë ky konglomerat përbën një mozaik të destinacioneve më atraktive të Malit të Zi, të cilat gjithsesi do t’ia ngrisin imazhin shtetit të parë ekologjik si destinacion i bukur turistik në rajon dhe në Evropë
Gjekë Gjonaj
Dashamirët e kinematografisë të Ulqinit javën që lamë pas mbushën përplot sallën e Qendrës Kulturore të këtij qyteti për të parë premierën e filmit për qytetin e tyre. Vlerat historike, turistike dhe trashëgimia kulturore e zonës së Ulqinit u prezantuan nëpërmjet shfaqjes filmike “Perla e Bunës”, me autorë vëllezërit Millan dhe Millutin Karaxhiq.
Kjo komedi romantike bashkëkohore si synim parësor kishte pikërisht promovimin dhe publikimin e vlerave të përmendura që mbart Ulqini, në shërbim të njohjes dhe të informimit të mijëra shikuesve që do ta ndjekin këtë film në Mal të Zi, në shtetet e rajonit dhe më gjerë. Që në minutat e parë fitoi simpatinë e atyre që e panë. Filmi disa herë gjatë shfaqjes u shoqërua me ovacione e duartrokitje të të gjithë njerëzve që ishin ngritur në këmbë në këtë mbrëmje të mrekullueshme, një gjë që ndodhë rrallë në evente të kësaj natyre në Ulqin.
Më gjerësisht mund ta lexoni në numrin “755” të revistës Koha Javore