Guci – Në seancën e parë të rregullt të Kuvendit të Komunës së Gucisë për vitin 2023, të mbajtur të enjtën, më 13 prill 2023, në sallën e Komunës për seanca, takime e tubime, në të cilën ishin të pranishëm 23 këshilltarë nga gjithsej 30 sa numëron Kuvendi i Komunës së Gucisë, janë trajtuar, shqyrtuar dhe miratuar një vistër propozim-vendimesh, konkludimesh e informatash të organeve të qeverisjes lokale dhe institucioneve e ndërmarrjeve që punojnë dhe veprojnë në kuadër të Komunës së Gucisë.
Në seancën, të cilën në gjuhën shqipe dhe atë malazeze e hapi kryetari i Kuvendit, Bujar Hasangjekaj, para fillimit të punës së saj, njëzëri pa vërejtje u miratua procesverbali nga seanca e katërt e rregullt e KK-së, të mbajtur më 29 dhjetor 2022, si rendi i ditës i propozuar nga kryetari i Kuvendit Hasangjekaj prej 17 pikash, i cili pësoi ndryshime dhe plotësime (një pikë u tërhoq dhe tri të tjera u shtuan).
Seanca filloi punën sipas renditjes së pikave të rendit të ditës me informatat mbi mbrojtjen e fëmijëve; mbi mbrojtjen sociale në territorin e Komunës së Gucisë për vitin 2022, të cilat në mënyrë koncize i prezantoi dhe e argumentoi përfaqësuesja e Qendrës për Punë Sociale, Merima Balliq; dhe mbi realizimin e mbrojtjes shëndetësore në Komunën e Gucisë për vitin 2022, që në mënyrë koncize, analitike dhe kronologjike e paraqiti dhe e argumentoi me fjalë dhe shifra ushtruesi i detyrës së drejtorit të Shtëpisë së Shëndetit “Dr. Branko Zogoviq” në Plavë, Dr. Armen Pejçinoviq, në kuadër të së cilës punon Stacioni shëndetësor në Guci.
Ndër shumë pyetje të këshilltarëve që iu parashtruan drejtorit Pejçinoviq, ishin edhe ato të këshilltarit Dardan Qosaj për mundësinë e rihapjes së punktit shëndetësor në Vuthaj, pasi që në objektin e Shtëpisë së Kulturës ekzistojnë dy lokale për këtë qëllim; dhe pyetja e kryetarit të Kuvendit, Hasangjekaj, në aspektin e të punësuarve në shëndetësi në komunat e Plavës dhe Gucisë ku shqiptarët janë të diskriminuar, sepse në institucionin e tyre nuk gjendet asnjë person i këtij komuniteti, i çfarëdo profesioni qoftë. Përgjigjja e drejtorit ishte se do bëhen përpjekje për zgjidhje sa më të shpejtë të tyre. Informata mbi gjendjen e sigurisë në territorin e Komunës së Gucisë në vitin 2022 nuk u prezantuan në seancë, ngase nuk erdhi referuesi relevant.
Seanca vazhdoi punën me shqyrtimin e propozim-vendimit mbi llogarinë përfundimtare të buxhetit të Komunës së Gucisë për vitin 2022, të cilin e parashtroi në mënyrë analitike dhe koncize sekretari i Sekretariatit për ekonomi, zhvillim dhe financa, Mirallem Bektesheviq.
Ai konfirmoi se buxheti i Komunës së Gucisë për vitin 2022 ishte planifikuar në shumën 2.335.950 euro, dhe është realizuar 68.30% e tij. Depoziti i transferuar në buxhet nga viti 2021 ka qenë 121.373.35 euro.
Të hyrat janë realizuar në shumën 1.595.258.44 euro, shpenzimet në shumën 1.499.294.04 euro kurse gjendja e depozitit më 31 dhjetor 2022 ka qenë 96.234.42 euro, dhe do të transferohet në buxhetin e Komunës për vitin 2023.
Pas trajtimit dhe shqyrtimit analitik e konciz të propozim-vendimit në fjalë, përkitazi me përmbajtjen e tij, ka diskutuar vetëm kryetari i KK-së, Bujar Hasangjekaj. Llogaria përfundimtare e buxhetit të Komunës së Gucisë për vitin 2022 është miratuar me 20 vota “për” dhe 3 “të përmbajtur”.
Në punën e mëtejme të seancës, e cila ka zgjatur rreth dy orë e gjysmë, këshilltarët e pranishëm kanë shqyrtuar dhe njëzëri, apo me shumicë votash “për”, kanë miratuar edhe gjashtë propozim-vendime të tjera të rendit të ditës: mbi dhënien e pëlqimit për ndryshimin e Statutit të Qendrës për Kulturë në Guci, të cilin e parashtroi drejtoresha e qendrës, Llejlla Balliq; mbi ndryshimin e vendimit për ndihma sociale, të cilin e prezantoi përfaqësuesja e Qendrës për Punë Sociale, Merima Balliq; mbi miratimin e programit të rregullimit hapësinor të Komunës së Gucisë për vitin 2023; mbi lirimin nga obligimi i pagesës së tarifës për pajisjen komunale të tokës ndërtimore; mbi shitjen e patundshmërisë me marrëveshje të drejtpërdrejtë, propozim-vendim që e prezantoi sekretarja e Sekretariatit për planifikim hapësinor, të pronës dhe mbrojtjes së mjedisit jetësor, Havaja Prelvukaj; dhe mbi pagat dhe të ardhurat e tjera të zyrtarëve dhe nëpunësve të Komunës, të cilin e prezantoi sekretari i Sekretariatit për ekonomi, zhvillim dhe financa, Mirallem Bektesheviq. Propozimet në fjalë u miratuan me ose pa pjesëmarrje në diskutim të këshilltarëve.
Gjatë punës së seancës janë trajtuar, shqyrtuar dhe miratuar edhe pesë konkludime të organeve, institucioneve dhe të ndërmarrjeve që punojnë dhe veprojnë në kuadër të Komunës: konkludimet mbi miratimin e raportit të punës së kryetares së Komunës dhe të punës së organeve dhe shërbimeve të Komunës së Gucisë për vitin 2022, të cilën e argumentoi kryetarja e Komunës, Anella Çekiq; mbi miratimin e raportit të punës dhe raportit financiar të SHPK “Veprimtaritë Komunale” të Gucisë për vitin 2022, të cilën e parashtroi drejtori, Demir Bajroviq; mbi miratimin e raportit të punës dhe raportit financiar të Organizatës Turistike të Gucisë për vitin 2022, të prezantuar nga drejtori Irfan Radonçiq; mbi miratimin e raportit të punës dhe raportit financiar të Qendrës për Kulturë të Gucisë për vitin 2022, të prezantuar nga drejtoresha Llejlla Balliq; dhe mbi miratimin e raportit të punës së Shërbimit të Kuvendit të Komunës së Gucisë për vitin 2022.
Në pikën e fundit të rendit të ditës – pyetje dhe përgjigje, këshilltarët parashtruan ca pyetje, përgjigjet e të cilave i kërkuan me shkrim.
Shaban Hasangjekaj