Podgoricë/Ulqin – Mali i Zi dhe Shqipëria, dy shtete fqinje me marrëdhënie të shkëlqyera, janë plotësisht të angazhuara për të forcuar bashkëpunimin dypalësh dhe stabilitetin në rajon, kanë konkluduar kryeministrat e Malit të Zi dhe Shqipërisë, Dushko Markoviq dhe Edi Rama, gjatë takimit të zhvilluar të hënën në Podgoricë.
Pas takimit të tyre kokë më kokë, ka vijuar takimi plenar mes dy delegacioneve.
Kryeministri i Malit të Zi, Dushko Markoviq, ka thënë në konferencën e përbashkët për shtyp se vizita e kryemistrit Edi Rama në Mal të Zi “është edhe një konfirmim i fuqishëm i marrëdhënieve të mira të Malit të Zi dhe Shqipërisë dhe njëkohësisht nxitje që në të ardhmen të punojmë jo vetëm për ruajtjen e këtij niveli të marrëdhënieve të mira fqinjësore, por edhe në avancimin e tyre”.
Ndërkaq kryeministri i Shqipërisë, Edi Rama, ka pohuar se Mali i Zi do të bëhet anëtari i 29-të i NATO-s, duke e cilësuar këtë si një arritje për të cilën Shqipëria ka bërë gjithçka ka mundur në mbështetje të Malit të Zi.
“Është një arritje historike jo vetëm për Malin e Zi, por për vetë rajonin tonë. Me futjen e Malit të Zi në NATO, e gjithë vija bregdetare e këtij krahu të Jonit dhe Adriatikut është zonë e NATO-s”, është shprehur ai.
Rama ka thënë se është “i inkurajuar për faktin se miku ynë dhe kryeministri i Malit të Zi, së bashku me forcat e tjera të këtij koalicioni qeverisës, i ka dhënë një shtytje serioze përpara marrëdhënieve me shqiptarët këtu në Malin e Zi, në drejtim të përmbushjes së të drejtave të tyre legjitime të përfaqësimit, të drejtave administrative, ekonomike, kulturore, si dhe një përfshirjeje edhe më të mirë të tyre në shoqëri”.
Markoviq dhe Rama janë zotuar se do të punojnë së bashku në projekte të përbashkëta në infrastrukturë, energji, turizëm.
Ata kanë paralajmëruar, me qëllim të bashkëpunimit më të mirë, takimin e Komitetit Ekonomik të Malit të Zi dhe Shqipërisë në Podgoricë, pas mbledhjes së zhvilluar në vitin 2013 në Tiranë, si dhe kandidimin e përbashkët të propozimit për zgjerimin e vendkalimit kufitar Sukubinë – Muriqan në Samitin e Ballkanit Perëndimor në Trieste.
Kryeministrat u dakordësuan për të zhvilluar në tetor një takim të përbashkët të dy qeverive, në Shkodër.
“Dua të nënvizoj edhe njëherë, se kemi vendosur të organizojmë mbledhjen e përbashkët të dy qeverive në Shkodër në muajin tetor, si fillimin e një cikli të ri marrëdhëniesh dhe e një përpjekjeje të re për të intensifikuar marrëdhëniet, në funksion të përmirësimit të jetës ekonomike dhe sociale të qytetarëve tanë, duke shfrytëzuar potencialet e përbashkëta që janë të mëdha dhe posaçërisht, duke i dhënë gjithë kësaj hapësire ndërkufitare një vëmendje më të madhe, të përbashkët, në funksion të rritjes ekonomike dhe cilësisë së jetës shoqërore”, ka thënë Rama.
Dy kryeministrat kanë paralajmëruar po ashtu hapjen në Plavë të Qendrës për bashkëpunimin policor mes dy shteteve me qëllim të luftës kundër krimit ndërkufitar dhe rritjes së nivelit të sigurisë.
Në mbyllje të bisedimeve, në prani të dy kryeministrave, ministrat e punëve të jashtme Srgjan Darmanoviq dhe Ditmir Bushati nënshkruan marrëveshjen e bashkëpunimit në fushën e shëndetësisë.
Gjatë vizitës së tij në Mal të Zi, kryeministri i Republikës së Shqipërisë, Edi Rama, i shoqëruar nga ministri i Punëve të Jashtme, Ditmir Bushati, deputeti Paulin Sterkaj, dhe ambasadori i Republikës së Shqipërisë në Mal të Zi, Ernal Filo, janë takuar në Ulqin me liderët politikë shqiptarë në Mal të Zi. (Kohapress)