Tivar – Kryetari i Komunës së Tivarit, dr. Zoran Srzentiq, ka pritur të hënën në një takim pune kryetarin e Komunës së Ulqinit, Nazif Cungu, si vazhdim i bashkëpunimit të filluar vitin e kaluar.
Në deklaratën për shtyp të zyrës së kryetarit të Komunës së Tivarit thuhet se në takim është biseduar mbi përgatitjet për sezonin e ardhshëm turistik dhe investimet në turizëm, problemet e furnizimit me ujë, si dhe çështjet e inerteve komunale dhe deponisë sanitare regjionale “Mozhur”.
Srzentiq dhe Cungu kanë shkëmbyer informacione mbi situatën financiare dhe ekonomike në komunat që drejtojnë.
Dy kryetarët kanë rënë dakort që takimi i ardhshëm të zhvillohet në Komunën e Ulqinit, më 2 shkurt, ku do të vazhdojnë bisedimet me pjesëmarrjen edhe të udhëheqësve të sekretariateve dhe drejtorëve të ndërmarrjeve publike.
Të dhënat e publikuara së fundmi nga Ministria e Ekonomisë mbi shkallën e zhvillimit të qeverisjeve vendore flasin se Tivari dhe Ulqini janë dy komunat më të pazhvilluara bregdetare në Mal të Zi, me indeks të zhvillimit 106, respektivisht 76 për qind.
(Kohapress)