Podgoricë – Kryetari i Komisionit të Senatit Amerikan për Shërbimet e Armatosura, John McCain, ka zhvilluar të mërkurën e kaluar një vizitë në Mal të Zi, në kuadër të turit të tij në disa vende të Ballkanit.
Në takim me Presidentin e Malit të Zi, Filip Vujanoviq, dhe kryeministrin Dushko Markoviq, ai ka vlerësuar se hyrja e Malit të Zi në NATO dhe integrimi i tij në Bashkimin Evropian janë pika të ndritura në këtë kohë të ngjarjeve turbulente në botë.
Në deklaratën për shtyp të qeverisë së Malit të Zi thuhet se Markoviq dhe McCain janë pajtuar se situata në rajon është serioze, në kontekstin e sigurisë dhe stabilitetit, si dhe që për ruajtjen e qetësisë dhe prosperitetit të shteteve është me rëndësi që BE-ja dhe SHBA të jenë të pranishme fuqishëm në Ballkanin Perëndimor.
Kryeministri Markoviq ka theksuar se ratifikimi i Protokollit për anëtarësimin e Malit të Zi dhe NATO dhe firmosja e tij nga Presidenti i SHBA-së, Donald Trump, është konfirmim i reformave që Mali i Zi i ka zbatuar viteve të kaluara si dhe i miqësisë dhe partneritetit të përhershëm dhe të qëndrueshëm të dy shteteve dhe dy popujve.
Gjatë vizitës së tij në Mal të Zi, senatori McCain është pritur edhe nga ministri i Mbrojtjes, Predrag Boshkoviq, si dhe ka takuar pjesëtarët e Ushtrisë së Malit të Zi, të cilët kanë qenë pjesë e Misionit në Afganistan.
Vizita e senatorit McCain u zhvillua në një kohë kur shumica e vendeve të Ballkanit janë përfshirë nga kriza politike dhe përpjekjet për forcimin e ndikimit rus në këtë hapësirë. Prandaj vizita e tij vlerësohet si tregues i përkushtimit amerikan për Ballkanin dhe barrierë e përpjekjeve të Rusisë për të rritur ndikimin e saj në këtë pjesë të Evropës. (Kohapress)