“Ne dëshirojmë pa rezervë që servisi publik të jetë vërtet servis i të gjithë qytetarëve për ofrimin e informacioneve të vërteta, të sakta dhe me kohë, e për të qenë kështu, ato informata assesi nuk guxojnë të jenë vetëm nga Podgorica dhe viset tjera të cilat janë afër, por nga të gjitha trevat e Malit të Zi”, ka theksuar drejtoresha e përgjithshme e RTMZ-së, Andrijana Kadija.
Plavë – Delegacioni i stafit drejtues të Radio Televizionit të Malit të Zi, në përbërje të të cilit ishin drejtoresha e përgjithshme Andrijana Kadija, ushtruesja e detyrës së drejtorit të televizionit, Olivera Vukadinoviq, kryetari i Këshillit të RTMZ-së, Vlladimir Paviqeviq, dhe anëtari i Këshillit, Goran Gjuroviq, vizituan Komunën e Plavës, me ç’rast biseduan me përfaqësuesit e strukturave të ndryshme shoqërore, kulturore, politike etj. lidhur me vërejtjet dhe sugjerimet, respektivisht anët pozitive dhe negative të programeve ditore që emetohen në RTMZ.
Në fjalën e saj përshëndetëse, drejtoresha Kadija u shpreh se është me rëndësi të dëgjohet drejtpërdrejt mendimi i publikut për programet e RTMZ-së.
“Pra, ne dëshirojmë pa rezervë që servisi publik, vërtet të jetë servis i të gjithë qytetarëve për ofrimin e informacioneve të vërteta, të sakta dhe me kohë, e për të qenë kështu, ato informata assesi nuk guxojnë të jenë vetëm nga Podgorica dhe viset tjera të cilat janë të afërta, por nga të gjitha trevat e Malit të Zi”, ka theksuar ajo.
Kadija ka thënë se qëllimi i takimit është që para së gjithash të dëgjojnë se “çfarë nuk ju pëlqen, çka nuk është mirë, çka duhet të përmirësohet, cilat emisione pritni me endje t’i shikoni e t’i përcillni, çka dëshironi të shikoni në ato emisione që ne ofrojmë, çka vërtet mungon që të jeni të kënaqur me programin e servisit tonë publik”.
Ndërkaq u.d. e drejtorit të Televizionit, Olivera Vukadinoviq, theksoi se në Plavë “ajo e ndjen veten si në shtëpinë e vet ngase në këtë trevë ajo ka qenë mysafire e shpeshtë si gazetare e këtij servisi dhe se për të gjitha ato që ajo ka shkruar dhe prezantuar e shikuesve nuk u kanë pëlqyer, e ndjen veten fajtore”.
Ajo kërkoi nga të pranishmit që të kritikojnë hapur dhe të bisedojnë lirisht për çdo gjë.
“Ne jemi përfaqësues të televizionit, andaj presim nga ju që t’i shprehni pa ngurrim vërejtjet dhe sugjerimet tuaja në këtë drejtim”, ka thënë Vukadinoviq.
Anëtari i Këshillit të RTMZ-së, Goran Gjuroviq, në mes tjerash theksoi se servisi publik i Malit të Zi duhet që sa më shumë të ofrojë program të nivelit lokal, pra të jetë sa më shumë me ekipet e veta në terren – në mjediset rurale në tërë Malin e Zi.
Afër dy orë kanë zgjatur pyetjet dhe përgjigjet e pjesëmarrësve në këtë takim, që kishin të bënin me të gjitha fushat në trevën e komunës: kulturën, arsimin, shëndetësinë, shkencën, artin etj.
Në deklaratën për gazetën “Koha javore”, drejtoresha e përgjithshme e RTMZ-së, Andrijana Kadija është shprehur se do t’i shqyrtojnë vërejtjet, mangësitë dhe sugjerimet e marra në takim me qytetarët.
“Mendojmë që ky është një hap përpara për avancimin e programit të punës sonë dhe do të bëjmë përpjekje që sugjerimet dhe vërejtjet e tyre ndaj programit tonë operativ t’i realizojmë. Kjo nuk do të jetë vizita jonë e fundit, prandaj do të keni mundësi që në takimet e radhës të konstatoni se a i kemi plotësuar kërkesat dhe propozimet tuaja”, ka thënë ajo.
Po të njëjtën ditë, përfaqësuesit e RTMZ-së vizituan edhe komunat e Beranit dhe Rozhajës, ku zhvilluan takime të ngjashme. Shaban Hasangjekaj