Në një njoftim për mediat nga kryeqyteti Albany i shtetit Nju Jork, thuhet se Senati, që është dhoma e epërme e legjislativit të këtij shteti miratoi më 2 maj, 2017 rezolutën për të caktuar 4 Shtatorin si, “Dita e Nënë Terezës”, në kujtim të Shenjtores shqiptare dhe bamirëses së njohur anë e mbanë botës si, Nënë Tereza. Sponsorizuesi i kësaj rezolute ishte Senatori Republikan Martin Golden i lagjes Bruklin të Nju Jorkut. Senatorit Golden iu bashkuan edhe 30 senatorë të tjerë, demokratë të cilët ko-sponsorizuan nismën e Senatorit republikan Golden, duke siguruar kështu miratimin e kësaj rezolute për shpalljen e 4 Shtatorit si dita kushtuar kujtimit të murgeshës dhe shenjtores shqiptare, Nënë Terezës. Miratimi i rezolutës u prit nga duartrokitje të ngrohta nga përfaqësuesit njujorkezë, në sallën e legjislaturës së Nju Jorkut në kryeqytetin, Albany.
“Në kujtim të një jete të kaluar në shërbim të Zotit dhe duke ndihmuar më të varfrit, jam krenar të paraqes këtë rezolutë e cila përshtatshmërish nderon Nën Terezën në shtetin e Nju Jorkut, në përputhje me ditën e kanonizimit dhe shpalljes së saj Shenjtëreshe të Kishës Katolike. Për shumë vite, nëpërmjet urdhrit të saj “Misionarët e Bamirësisë”, ajo ia ka dedikuar jetën dhe veprimtarinë e saj, nevojave të sëmurëve dhe më të varfërve”, është shprehur Senatori Martin Golden duke njoftuar miratimin e rezolutës.
Senatori Golden vazhdoi duke theksuar se, “Si një simbol ndërkombëtar i dashurisë, Nënë Teresa — e lindur në një familje shqiptare dhe e pagëzuar me emrin Anjezë Gonxhe Bojaxhiu — me veprën e saj pati një ndikim të madh në botë dhe si e tillë, shteti Nju Jork do ta kujtojë dhe do t’a nderojë atë për gjithmonë”, përfundoi Senatori Martin Golden njoftimin se tani e tutje, 4 Shtatori, që është edhe data që shënon shënjtërimin e saj, do të njihet si ,“Dita e Nënë Terezës” në shtetin Nju Jork. F. Shkreli