Tiranë – Ministrja e Mbrojtjes së Shqipërisë, Mimi Kodheli, ka pritur homologun e tij të Malit të Zi, Predrag Boshkoviq, në vizitën e tij të parë si ministër i Mbrojtjes në Tiranë, me të cilin kanë biseduar për proceset e integrimeve euro-atlantike dhe gjendjen e sigurisë në rajon.
Në deklaratën për shtyp të Ministrisë së Mbrojtjes së Shqipërisë thuhet se ministrja Kodheli e cilësoi këtë vizitë si një mundësi të shkëlqyer për t’i rikonfirmuar Malit të Zi se shumë shpejt do të rreshtohet zyrtarisht si anëtar me të drejta të plota në NATO.
“Kujtoj se, Shqipëria ishte ndër vendet e para, që ratifikoi në Kuvend instrumentet e aderimit të Republikës së Malit të Zi në Traktatin e Uashingtonit”, është shprehur ajo.
Kodheli ka thënë se e ardhmja e përbashkët e vendeve të Ballkanit është NATO dhe Bashkimi Evropian.
“Pa dyshim, është mënyra e vetme për të përballuar sfidat tona të përbashkëta, sfida këto gjithmonë në rritje, sidomos në fushën e mbrojtjes dhe sigurisë. Shqipëria dënon çdo ndërhyrje në punët e brendshme të shteteve të pavarura, çdo influencë në vendimmarrjen e popujve sovranë, çdo synim për një destabilizim të Ballkanit dhe largimin e rajonit tonë nga rruga e vetme, rruga e vlerave, rruga evropiane”, ka thënë ajo.
Ministrja Kodheli përshëndeti shqiptarët e Malit të Zi, të cilët i konsideroi si një urë të përjetshme lidhëse mes të dy vendeve.
Nga ana e tij, ministri i Mbrojtjes i Malit të Zi, Predrag Boshkoviq, falënderoi ministren Kodheli për ftesën dhe gjithashtu për punën e bërë dhe mbështetjen për anëtarësimin e Malit të Zi në NATO.
Ai ka theksuar se në takimin e përbashkët kanë konstatuar faktin, interesin e përbashkët që kanë të dy shtetet për qetësinë dhe paqen në rajon.
“Do të bëjmë gjithçka që të sigurojmë ruajtjen e paqes dhe të qetësisë në rajonin tonë edhe pse ka tendenca për prishjen e qetësisë dhe të destabilizimit në rajon. Gjithashtu ne do të vazhdojmë rrugën tonë, rrugën që kemi zgjedhur si para zgjedhjeve edhe pas zgjedhjeve 2016”, ka deklaruar Boshkoviq.
Takimi u zhvillua në një kohë kur shumica e vendeve të Ballkanit po kalojnë një periudhë jo të qetë në aspektin e sigurisë dhe kur Mali i Zi pritet të bëhet anëtar i Aleancës Veri-Atlantike NATO.
(Kohapress)