Prishtinë – Ministri i Arsimit, Shkencës dhe Teknologjisë së Republikës së Kosovës, Arsim Bajrami, ka pritur ministrin për të Drejtat e Njeriut dhe Pakicave, Mehmet Zenka, i shoqëruar nga drejtori i përgjithshëm i Drejtorisë për avancimin dhe mbrojtjen e të drejtave të popujve pakicë dhe bashkësive të pakicave të tjera nacionale pranë kësaj ministrie, Leon Gjokaj, dhe drejtori i Drejtorisë për arsimimin e pjesëtarëve të popujve pakicë dhe bashkësive të pakicave të tjera nacionale në Ministrinë e Arsimit, Marash Dukaj.
Në deklaratën për shtyp të MASHT-it thuhet se në këtë takim është biseduar për shumë çështje të shqiptarëve që jetojnë në Mal të Zi, me theks të veçantë për arsimin në gjuhën shqipe, si dhe për ndihmën që mund të japë Kosova në këtë drejtim.
Bajrami theksoi faktin se Kosova ka një bashkëpunim shumë të mirë me Malin e Zi në sferën e arsimit.
Ai tha se Kosova ka ndihmuar shqiptarët në Mal të Zi në shumë forma, si me tekste shkollore, me ndarjen e kuotave për studentë, por shprehu gatishmërinë për të ndihmuar edhe në trajnimin e mësimdhënësve të arsimit parauniversitar dhe në fusha të tjera.
Ministri për të Drejtat e Njeriut dhe Pakicave, Mehmet Zenka, falënderoi ministrin Bajrami për gatishmërinë e vazhdueshme për të ndihmuar në forcimin e arsimit në gjuhën shqipe në Mal të Zi.
Ai theksoi se Kosova gjithmonë ka qenë në fokus të interesimit të të rinjve shqiptarë në Mal të Zi sa i përket arsimimit të lartë dhe ky interesim vazhdon të jetë i madh.
Gjatë vizitës së tij në Kosovës, delegacioni qeveritar nga Mali i Zi ka vizituar edhe Universitetin e Prishtinës, ku ka folur me Rektorin e këtij Universiteti, Marjan Dema, mbi forcimin e bashkëpunimit.
Në deklaratën për shtyp të Ministrisë për të Drejtat e Njeriut dhe Pakicave thuhet se në takime është vlerësuar se është e nevojshme që karakteri interkulturor i sistemit të arsimit të avancohet më tej dhe se në këtë drejtim ekziston nevoja e shprehur gjithnjë e më tepër për shkëmbimin e shembujve të praktikave dhe përvojave të mira.
Ministri Zenka ka biseduar edhe me anëtarët e Shoqatës së Malazezëve të Kosovës. Në fokus të takimit ka qenë rëndësia e Strategjisë për afirmimin dhe integrimin e komunitetit malazez në Republikën e Kosovës 2016-2021, e miratuar para pak kohësh.
Në takim është konkluduar se duhet të punohet bashkërisht në afirmimin dhe ruajtjen e identitetit të pakicës malazeze në Kosovë, si dhe integrimin e saj të plotë në shoqërinë kosovare. Lidhur me këtë është biseduar për vizitën e përfaqësuesve të resoreve relevante në Qeverinë e Malit të Zi për realizimin e Strategjisë së përmendur si dhe Planit të veprimit për zbatimin e saj.
Është propozuar nënshkrimi i Memorandumit të bashkëpunimit me Këshillin Kombëtar të Shqiptarëve në Malin e Zi, si dhe intensifikimin e aktiviteteve për rritjen e përfshirjes së pjesëtarëve të komunitet malazez në të gjitha nivelet në institucionet e Kosovës. (Kohapress)