Kosova është renditur ndër vendet më të sigurta në botë dhe e para në Evropë për ndjenjën e sigurisë së qytetarëve dhe besimin ndaj institucioneve të zbatimit të ligjit, sipas raportit më të ri ndërkombëtar Gallup Global Safety Report 2025, i publikuar në fillim të muajit shtator.
Në këtë raport prestigjioz, Kosova ka arritur 94 pikë nga 100 në Indeksin e Ligjit dhe Rendit, duke u pozicionuar e treta në nivel global, pas Taxhikistanit (97 pikë) dhe Singaporit (95 pikë). Ky vlerësim e vendos Kosovën përpara shteteve të njohura për nivelin e lartë të sigurisë, si Islanda, Norvegjia, Austria dhe Zvicra.
Një tjetër tregues domethënës është fakti se 89% e qytetarëve të Kosovës shprehen se ndihen të sigurt duke ecur vetëm natën në zonat ku jetojnë – një ndër përqindjet më të larta në botë dhe në Evropë.
Policia e Kosovës thekson se këto rezultate pozitive janë fryt i përkushtimit të vazhdueshëm në garantimin e rendit dhe sigurisë publike, bashkëpunimit të ngushtë me qytetarët dhe institucione të tjera të sigurisë, si dhe mbështetjes së vazhdueshme nga partnerët strategjikë ndërkombëtarë.
“Ky vlerësim është një dëshmi e qartë e përkushtimit të Policisë së Kosovës për ofrimin e një shërbimi profesional, efektiv dhe llogaridhënës për të gjithë qytetarët pa dallim”, thuhet në reagimin zyrtar të Policisë në rrjetet sociale.
Sipas të njëjtit raport, Mali i Zi ka arritur 90 pikë nga 100 në Indeksin e Ligjit dhe Rendit, duke zënë vendin e tetë në Evropë dhe 17-të në nivel botëror, ndërsa Shqipëria me 85 pikë renditet në vendin e 23-të në nivel botëror në aspektin e sigurisë.
Edhe sa i përket sigurisë së ecjes vetëm natën, një tjetër tregues në këtë raport, Kosova (89 pikë) ndodhet para Malit të Zi me 87 pikë dhe Shqipërisë me 71 pikë.
(Kohapress)