Podgoricë – Kryeministri i Malit të Zi, Dushko Markoviq, dhe krerët e Komunës së Ulqinit kanë vlerësuar se me qëllim të realizimit të interesave të investitorëve të huaj në Ulqin është i nevojshëm forcimi i mëtejshëm i infrastrukturës së gjithëmbarshme si dhe niveli më i lartë i efikasitetit të administratës shtetërore dhe asaj lokale.
Markoviq është takuar të premten në Podgoricë me kryetarin e Komunës së Ulqinit, Nazif Cungu, dhe kryetarin e Kuvendit të Komunës së Ulqinit, Loro Nrekiqi.
Në deklaratën për shtyp të zyrës së kryeministrit thuhet se Markoviq ka nënvizuar kompleksitetin e situatës ekonomike dhe nevojën e kursimit dhe shpenzimit racional, por ka theksuar se komponenti zhvillimor nuk guxon të kërcënohet.
Duke vënë në pah rëndësinë e infrastrukturës rrugore, kryeministri i Malit të Zi ka theksuar se për komunën e Ulqinit për vitin 2017 nga buxheti i shtetit janë ndarë 9.5 milionë euro, prej të cilave pjesa më e madhe për rrugën Ulqin – Krythë.
Përpos infrastrukturës rrugore, Markoviq ka theksuar rëndësinë e përmirësimit të infrastrukturës komunale si dhe avancimin e efikasitetit të funksionimit në vendkalimet kufitare.
Krerët e Komunës së Ulqinit kanë paralajmëruar përmirësim të infrastrukturës komunale, duke iu falënderuar edhe Qeverisë për mbështetjen financiare në këtë pjesë. Është konstatuar mbështetja në shumën prej 2.2 milionë euro nëpërmjet programit të Drejtorisë për Punë Publike për vitin 2017 për projekte të ndryshme infrastrukturore.
Bashkëbiseduesit kanë theksuar nevojën e rritjes së kapaciteteve hotelierike në Ulqin, dhe në këtë kontekst kryeministri Markoviq ka nënvizuar interesimin serioz të kompanive me renome Karizma dhe TUI, të cilat dëshirojnë të investojnë në Rivierën e Ulqinit.
Kryetarët Cungu dhe Nrekiqi kanë theksuar po ashtu nevojën e zgjidhjes së problemit të ndërtimit informal në territorin e komunës së Ulqinit dhe kanë theksuar përparimet që janë bërë me miratimin e planit hapësinor, si parakusht për rregullimin e gjendjes në këtë fushë. (Kohapress)