Ulqin – Me sfilatën e modës dhe ekspozitën e piktorëve nga 15 vende të botës dhe katër kontinente, është mbyllur edicioni i sivjetshëm i manifestimit “Të gjithë për turizëm”, i organizuar nga Organizata Turistike e Ulqinit, me të cilin është hapur zyrtarisht sezoni veror 2017 në Ulqin.
Edicioni i sivjetshëm i këtij manifestimi tradicional ka mbledhur studiues, artistë, këngëtarë, dizajnerë dhe të tjerë në një vend, të cilët e kanë bërë këtë manifestim një aktivitet të jashtëzakonshëm.
Manifestimi ka filluar me panairin e artizanëve, ku punimet e veta i kanë ekspozuar rreth 70 artizanë, dhe me koncertin gala në Ranë.
Të mërkurën e kaluar, për të parën herë OTU-ja ka organizuar simpoziumin “Servantesi ndër kohëra”, ku kanë marrë pjesë studiuesit Ertugul Onalp nga Turqia, Jolanda Bestiero de la Fuente dhe Daniel Sesilia nga Spanja, si dhe prof. dr. Ruzhdi Ushaku dhe Ismet Karamanaga nga Ulqini. Në të është trajtuar çështja e mundësisë së qëndrimit të Servantesit në Ulqin.
Po këtë ditë, në Galerinë “Kulla e Balshajve” është mbajtur veprimtaria “Detaria e Ulqinit”, ku është folur për traditën dhe trashëgiminë në fushën e detarisë.
Të enjten dhe të premten është organizuar Festivali ndërkombëtar i muzikës qytetare, ku kanë marrë pjesë grupe të ndryshme nga Turqia, Peja, Gjilani, Podgorica, Budva, Kotorri, Tivari dhe Ulqini. Të gjithë të pranishmit kanë pasur mundësi të kënaqen me tingujt e kësaj muzike, por edhe të kujtojnë nëpërmjet video materialeve punën e grupeve me të cilët Ulqini ka qenë gjithmonë i njohur.
Të shtunën mbrëma, në mjediset e Muzeut në Kalanë e Ulqinit është mbajtur sfilata e modës “Fashion night”, me ndërthurjen e bukurisë, talentit dhe glamurit.
Po në këtë mjedis, të dielën është hapur ekspozita e piktorëve pjesëmarrës në koloninë artistike të organizuar nga Shoqata “Art Dulcinium” në bashkëpunim me OTU-në.
Organizata Turistike e Ulqinit dhe drejtori i saj Mr. Fuad Haxhibeti falënderojnë të gjithë që kanë qenë pjesë e manifestimit “Të gjithë për turizëm” dhe kanë kontribuar për një promovim më të mirë të ofertës turistike të Ulqinit dhe në mënyrë kaq të bukur bënë hapjen e sezonit veror 2017, për të cilin nga OTU-ja shpresojnë të jetë i suksesshëm. (Kohapress)