Parlamenti i Spanjës i ka hapur dritën jeshile Malit të Zi në rrugën për anëtarësim në NATO pasi që të premten ka miratuar Protokollin e anëtarësimit.
Siç njofton qeveria e Malit të Zi, procesi i ratifikimit të protokollit për anëtarësim ka filluar në vendet anëtare të Aleancës qysh në qershor të vitit 2012. Islanda ka qenë vendi i parë që e ka ratifikuar protokollin, më 8 qershor të vitit të kaluar, pikërisht dhjetë vjet pasi i njëjti vend e ka njohur pavarësinë e Malit të Zi.
Ratifikimi për marrëveshjen e Atlantikut të Veriut është miratuar njëzëri nga Kuvendi i Malit të Zi, më 28 prill të këtij viti. Më 1 qershor, pasi të hyjë në fuqi akti i ratifikimit në Holandë, ku ka përfunduar procedura, do të pasojë edhe ftesa nga Sekretari i Përgjithshëm Jens Stoltenberg, për Malin e Zi që t’i bashkëngjitet NATO-s, kanë sqaruar burimet nga qeveria e Malit të Zi.
Siç ka paralajmëruar kryeministri Dushko Markoviq, Mali i Zi me krenari po përfundon një nga objektivat kryesore për zhvillimin e një shteti modern dhe demokratik. Me depozitimin e instrumenteve të ratifikimit, që është planifikuar më 5 qershor, Mali i Zi do të bëhet zyrtarisht anëtari i 29-të i NATO-s.
Në të kaluarën Moska ka qenë jo vetëm kritikuese e ashpër e hyrjes së Malit të Zi në NATO, por jo rrallë herë kishte kërcënuar ish-republikën jugosllave në mënyrë të hapur nëpërmjet zyrtarëve rusë, që të mos bashkohet me aleancën.
Në zgjedhjet e fundit në Mal të Zi pati përpjekje për një grusht shteti, ndërsa zyrtarët malazezë fajësuan Moskën se qëndron prapa komplotit. (VOA)