Ulqin – Kryetari i deritashëm i Partisë Demokratike, Fatmir Gjeka, është rizgjedhur kryetar i kësaj force politike në Kuvendin e Dytë Zgjedhor, të mbajtur të shtunën në Qendrën e Kulturës në Ulqin.
Delegatët e Kuvendit kanë miratuar ndryshimet dhe plotësimet e Statutit.
Kuvendi ka zgjedhur po ashtu zëvendëskryetar Gzim Hajdinagën, ish-ministër për të Drejtat e Njeriut dhe Pakicave dhe ish-kryetar i Komunës së Ulqinit, si dhe Këshillin Qendror të përbërë nga 57 anëtarë.
Në fjalën përshëndetëse, kryetari Gjeka ka thënë se këto pesë vite të veprimtarisë politike të PD-së nuk kanë qenë të lehta, por të mbushura me plot sfida.
“Por falë dijes, përvojës dhe pjekurisë sonë politike kemi arritur që t’i përballojmë me sukses. Ne kemi dëshmuar se dimë të udhëheqim dhe të menaxhojmë, por po ashtu kemi treguar se dimë të jemi edhe opozitë konstruktive”, është shprehur ai.
Ndërsa duke folur për të ardhmen, Gjeka ka thënë se PD-ja ka krijuar tashmë profilin e saj, “si parti konstruktive dhe institucionaliste, e udhëhequr nga parimi i transparencës në punën e saj”.
“Ajo hyn në një fazë të re të zhvillimit të saj, e gatshme për t’u ballafaquar me sfidat e reja dhe nevojat e kohës”, ka thënë kryetari i PD-së.
Në Kuvend kanë marrë pjesë si mysafirë kryetari i Frymës së Re Demokratike, Bamir Topi, ish-President i Republikës së Shqipërisë, nënkryetari i Lidhjes Demokratike të Kosovës, Lutfi Haziri, nënkryetarja e Listës së Barabartë (LIBRA) dhe deputetja në Kuvendin e Republikës së Shqipërisë, Mimoza Hafizi, anëtarët e kryesisë së Lëvizjes “Vetëvendosje!” – Boiken Abazi, Xhelal Sveçla dhe Nora Fetoshi, përfaqësuesi i Aleancës për Ardhmërinë e Kosovës, Sutki Hulaj, përfaqësues të forcave politike shqiptare në Mal të Zi dhe të disa partive politike të tjera.
Partia Demokratike është themeluar më 24 dhjetor 2011.
i. k.