Në zgjedhjet presidenciale që do të mbahen më 15 prill do të garojnë shtatë kandidatë.
Komisioni Shtetëror i Zgjedhjeve ka bërë të ditur se deri të hënën mbrëma, kur ka qenë afati përfundimtar për dorëzimin e nënshkrimeve, ka vërtetuar kadidaturat për President të Malit të Zi të kryetarit të Partisë së Drejtësisë dhe Pajtimit, Hazbija Kalaç, kandidatit të pavarur Vasilije Millaçiq, kryetarit të partisë Mali i Zi i Drejtë, Marko Millaçiq, kandidates së Partisë Socialdemokrate, Draginja Vuksanoviq, e cila ka mbështetjen edhe të partisë DEMOS, kryetarit të Koalicionit Serb, Dobrillo Dedeiq, kryetarit të Partisë Demokratike të Socialistëve, Millo Gjukanoviq, dhe kandidatit Mlladen Bojaniq, i cili mbështetet nga pjesa më e madhe e partive të opozitës, përfshirë Frontin Demokratik, Demokratët e Malit të Zi, Partinë Popullore Socialiste dhe Lëvizjen Qytetare URA.
Më herët, kandidaturat e tyre i kanë tërhequr kandidati i pavarur prof. dr. Gjorgjije Blazhiq dhe kryetari i Malit të Zi të Bashkuar, Goran Danilloviq, të cilët kanë thënë se do të mbështesin kandidatin e opozitës Mlladen Bojaniq, kurse kandidati i pavarur, shkencëtari Dragan Hajdukoviq, nuk ka arritur të mbledhë numrin e nevojshëm të nënshkrimeve për dorëzimin e kandidaturës për president të Malit të Zi.
Siç shihet, edhe në këto zgjedhje presidenciale nuk do të ketë asnjë kandidat shqiptar.
Dy partitë shqiptare, Unioni Demokratik i Shqiptarëve dhe Partia Demokratike, kanë deklaruar se në zgjedhjet presidenciale do të mbështesin kandidatin e PDS-së, Millo Gjukanoviq.
Në deklaratën për shtyp të UDSH-së thuhet se Këshilli Qendror i kësaj partie vendosi të mbështesë Gjukanoviqin për arsye se ai është garanci e stabilitetit dhe e përparimit të Malit të Zi.
“UDSH dhe PDS ndërtojnë partneritetin e vet prej vitit 1997 dhe ky vendim i yni është vazhdim i natyrshëm i bashkëpunimit tonë të deritashëm. Po ashtu, Malin e Zi në periudhën e ardhshme e presin sfida të shumta në rrugën e arritjes së standardeve evropiane dhe perëndimore. Që të arrihet kjo, atij i nevojitet stabilitet dhe ecje përpara, e garancia më e mirë e stabilitetit dhe përparimit të Malit të Zi është pikërisht Gjukanoviqi”, thekson deklarata për shtyp.
Edhe Partia Demokratike mbështetjen e kandidaturës së Gjukanoviqit për president e ka arsyetuar me pothuajse të njëjtin argumentim.
“Gjukanoviqi është partneri ynë i vjetër i koalicionit. Jemi të bindur se ai personalisht është garanci e integrimeve euroatlantike, i marrëdhënieve shumë të mira me vendet në rajon dhe i demokracisë multietnike në Mal të Zi”, kanë deklaruar nga kjo parti.
Ndërkohë, dy partitë tjera parlamentare shqiptare që janë pjesë e koalicionit qeverisës së nivel shtetëror, Forca e Re Demokratike dhe Alternativa Shqiptare, nuk janë deklaruar akoma publikisht nëse do të mbështesin ndonjërin prej kandidatëve në zgjedhjet presidenciale, ashtu si dhe partitë tjera joparlamentare shqiptare. (Kohapress)