Guci – Në negociatat që zhvilluan subjektet politike pjesëmarrëse në zgjedhjet e rregullta lokale në Komunën e Gucisë, të mbajtura më 15 shtator 2024, në të cilat garuan dy koalicione, dy subjekte të pavarura politike dhe një grup qytetarësh, arrihet marrëveshja për formimin e pushtetit (qeverisjes) lokale, ashtu që në mandatin e ri katërvjeçar, kryesues i qytetit të Gucisë do të jetë dikush nga radha e Parisë Boshnjake. Pos postit të kryetarit të ri të Komunës së Gucisë, i cili do t’i takojë PB-së, Socialdemokratëve do t’i takojë vendi i kryetarit të Kuvendit të Komunës, ndërsa Partisë socialdemokrate dhe Grupit të qytetarëve “Lëvizja për Gucinë” (anëtare e koalicionit paszgjedhor e qeverisjes së re lokale), do t’u takojnë vendet e nga një nënkryetari të Komunës, bën të ditur për opinion publik portali “Standard” nga burimet mirë të njoftuara të Koalicionit “Me zemër për Gucinë” (PB, SD, PSD), i cili ngadhënjeu bindshëm në zgjedhje, duke fituar 14 mandate prej gjithsej 30, sa do të numërojë Kuvendi në mandatin e ri katërvjeçar.
Sipas njohurive të “Standardit”, më 25 tetor 2024, do të mbahet seanca konstitutive e Kuvendit të Komunës, në të cilën do të bëhet verifikimin i 30 këshilltarëve të rinj të KK-së dhe zyrtarisht do të bëhet zgjedhja e udhëheqësisë (administrimit) lokale të qytetit: kryetarit të Komunës nga radhët e PB-së, kryetarit të Kuvendit të Komunës nga radhët e SD-së dhe të dy nënkryetarëve të Komunës nga radhët e Partisë Socialdemokrate dhe Grupit të qytetarëve “Lëvizja për Gucinë”.
Në fund të kësaj informate, përkujtojmë se në zgjedhjet e rregullta lokale në Komunën e Gucisë, të mbajtura më 15 shtator 2024, në të cilat garuan pesë lista zgjedhore dhe u zhvilluan në 10 vendvotime (tri në Guci dhe shtatë në vendbanimet periferike rurale), arritën rezultatet: Koalicioni “Me zemër për Gucinë” (PB, SD, PSD) fitoi 14 mandate këshilltarësh, Koalicioni “Së bashku për Gucinë” (Forumi i shqiptarëve dhe UDSH) shtatë mandate këshilltarësh, Partia Demokratike e Socialistëve (PDS) gjashtë mandate këshilltarësh, Grupi i qytetarëve “Lëvizja për Gucinë” (subjekt politik shqiptar) dy mandate këshilltarësh dhe Subjekti politik Mali i Zi Demokratik një mandat këshilltari.
Shaban Hasangjekaj