Ostros – Të premten, më 10 mars, Shkolla Fillore “Gjergj Kastrioti – Skënderbeu” në Ostros shënoi përvjetorin e tetëdhjetë e tetë të saj. Me këtë rast nxënësit, anëtarë të seksioneve të ndryshme, shfaqen një program të larmishëm, të gërshetuar me këngë, valle, recitime dhe grimca humoristike.
Salla e edukimit fizik, ku u mbajt manifestimi, ishte e mbushur përplot me manifestues, nxënës, prindër dhe qytetarë të Krajës dhe të tjerë që kishin ardhur për të ndjekur programin e fëmijëve.
Po në këtë ditë të shënuar të arsimit në Krajë u promovua numri 19 i revistës së shkollës “Valët”. Nderuan me pjesëmarrjen e tyre në këtë ditë të shënuar sekretari i Ministrisë së Arsimit të Malit të Zi, Omer Mehmedoviq, drejtori i Drejtorisë për Arsimimin e Pjesëtarëve të Popujve Pakicë dhe Bashkësive të Tjera Nacionale të Pakicave në Ministrinë e Arsimit, Marash Dukaj, nënkryetarja e komunës së Tivarit, Sllagjana Zhivanoviq, sekretari i KKSH-së, Faik Nika, kryetari i Komisionit për Arsim dhe Përdorim Zyrtar të Gjuhës Shqipe pranë KKSH-së, Ismet Kallaba, si dhe shumë personalitete të jetës arsimore, kulturore e politike të Tivarit etj.
Ali Gjeçbritaj