Muzikanti nga Ulqini, Ardit Seferi, është një djalosh i ri vetëm 19- vjeçar, por që shquhet si një talent i rrallë për ekzekutimin në instrumentin e organos. Pasioni për muzikën i lindi që në moshën e fëmijërisë, kur ishte fare i vogël, madje kishte vetëm 8 vjet kur filloi të dalë në skenë, përkrah muzikantëve dhe këngëtarëve të Ulqinit.
Arditi për këtë bashkëbisedim për gazetën “Koha Javore” tregon se debutimin në skenë si solo muzikant, e bëri kur kishte 13- vjeç, pra në moshë fëmijërie, por që talenti që e karakterizonte duke ekzekutuar në organo, i mundësoi atij dhe iu besua që të bënte muzikë me këngëtarë të njohur dhe të afirmuar të Ulqinit.
Arditi thotë se këtë talent për muzikën e ka trashëguar nga babai i tij, muzikanti i njohur, Bajram Seferi, i cili ka një përvojë tejet të gjatë si muzikant.
Talentin që kishte Arditi, e kishin vërejtur edhe mësimdhënësit në shkollë, ku ai, merrte pjesë nëpër gara dhe festivale të ndryshme shkollore, ku edhe ishte vlerësuar për talentin e tij të jashtëzakonshëm si muzikant.
Arditi tregon se nuk frikësohej nga skena, por me shumë vullnet shoqëronte këngëtarët pa pasur asnjë ndrojtje. Por nga ana tjetër- shprehet ai- publiku ishte ai që shfaqte habi teksa shikonte një fëmijë i cili i vetëm pas organos, përcillte këngëtarët që këndonin nga repertori i tyre.
“Dua të falënderoj të gjithë shokët e m’i, këngëtarët dhe muzikantët, të cilët patën besim tek unë që të më merrnin si muzikant në atë moshë aq të vogël. Falënderoj edhe publikun i cili në çdo paraqitje që kisha në skenë, më jepte vullnet dhe kurajë për të vazhduar, duke më duartrokitur pafund, me shumë entuziazëm”, shprehet Arditi.
Muzika për të është ushqimi i shpirtit, dhe se pa muzikën ai nuk e imagjinon jetën në asnjë moment të saj.
Ardit Seferi, me një talent të një mjeshtri virtuoz në organo, ka tashmë shtatë vite që merret intensivisht me muzikën. Ai është shumë aktiv nëpër dasma dhe ahengje të ndryshme familjare, duke shoqëruar kështu me organo këngëtarë të njohur, disa nga të cilët kanë bërë emër edhe në rangun kombëtar.
“Më së shumti punoj nëpër dasma, ku më ftojnë shumë këngëtarë nga Ulqini, Shkodra, Tuzi dhe gjetiu”, thekson Seferi.
Arditi para një viti ka hapur edhe studion e tij muzikore me kushte bashkëkohore, ku realizon instrumentale të ndryshme dhe këngë për shumë këngëtarë.
I pyetur se cila është formula e gjithë këtij suksesi dhe e kësaj mjeshtërie të arritur, Arditi përgjigjet, duke thënë: “Puna dhe vullneti janë jetike për një sukses të lakmueshëm, sepse, asgjë nuk është e pamundur, në qoftë se punon me mund, zell dhe zemër, që të arrish pikësynimin”, shprehet Seferi.
Ai tashmë është në moshën e pjekurisë dhe ka mbaruar Shkollën e Mesme “Vëllazërim-Bashkim” në Ulqin. Pas përfundimit të maturës, ai ka vendosur që talentin dhe mjeshtërinë në muzikë ta përforcojë dhe ta afirmojë në mënyrë profesionale.
Arditi vazhdoi shkollimin e lart, në Kolegjin AAB në Prishtinë, ku po ndjek studimet në degën e muzikologjisë- muzikë e përgjithshme.
Me shpresë që ky i ri me një talent të rrallë do të tregojë sukses të lartë edhe në studime që po ndjek, ne i urojmë suksese të mëtejshme në rrugëtimin e tij drejtë artit muzikor, që të arrisë pikësynimin e tij, duke u kualifikuar si muzikant profesionist, për të dhënë më pas kontributin e tij me përkushtim në vendin dhe shoqërinë tonë.
Toni Ujkaj