Në kilometrin e pestë të rrugës magjistrale, që nga Plava shpie për në Guci, në anën e djathtë të luginës piktoreske të Lumit Luça, mu rrëzë bjeshkës së Visitorit të lartë, thepisur e kreshnik, fillon shtrirja e Martinajve, fshat i Komunës së Gucisë, i cili dikur radhitej ndër vendbanimet më të mëdha atëherë të Komunës së Plavës, i cili numëronte më se 80 familje me mbi 500 banorë, kryesisht të popullatës shqiptare. Por, migrimi dhe emigrimi e ka bërë të veten. Sot numri i familjeve dhe i banorëve ka rënë dukshëm. Shpërngulja mjaftë e shprehur, është brenga më e madhe e tij. Papunësia ka bërë që të rinjtë, por edhe të tjerët të moshave më të shtyra ta braktisin atë për të kërkuar në Diasporë anë e kënd botës kushte më të mira jetësore për vete dhe familje.
Mirëpo, edhe përkundër gjithë kësaj, ajo që më së shumti e karakterizon dhe e bën të zëshëm dhe më të theksuar, është e dhëna se fshati Martinaj është truall burimi i një numri shumë të madh intelektualësh profilesh të ndryshme profesionale, të cilët kontributin e vet e shprehin në komunat e Plavës dhe Gucisë, në Kosovë e Shqipëri, në Evropë e SHBA dhe anë e kënd Botës. Njëri ndër ta është edhe mjeku i ri specialist i ortopedisë dhe traumatologjisë, dr. Arzen Balidemaj.
U lind në Prishtinë, më 17 qershor të vitit 1984, në kohën kur i ati i tij Arifi ishte i punësuar në një ndërmarrje të këtushme tregtare. Shkollën fillore tetëvjeçare, e filloi në Prishtinë dhe e kreu në Pejë, pasi që familja e tij erdhi të jetojë në këtë qytet. Në Pejë e kreu Gjimnazin “11 Maji” (tani “Bedri Pejani”), me sukses të lartë në mësime. Në vitin vijues shkollor, arrin që ta regjistrojë Fakultetin e Mjekësisë në Universitetin “Hasan Prishtina” në Prishtinë, të cilin me sukses të lartë e përfundon në vitin 2010. Pas një viti pauze, vendosë që ngritjen e vet profesionale specializimin ta vazhdojë dhe përfundojë jashtë Kosovës, në Gjermani.
Pikërisht, më 2 nëntor të vitit 2011, rruga e gjatë e udhëtimit e shpie në Gjermani në qytetin Frankfurt, ku pos punës si mjek fillestar i praktikës së përgjithshme në një spital të këtushëm, vazhdon specializimin në fushën e ortopedisë dhe traumatologjisë dhe në vitin 2018 merr titullin Mjek specialist i ortopedisë dhe traumatologjisë.
Ortopedi e traumatologu dr. Arzen Balidemaj, aktualisht punon kryemjek në Orthopaedische Klinik Bad Hersfeld, e cilësuar si njëra nga klinikat më të suksesshme në gjermani.
Në pyetjet e shpeshta që gazetarët e mediave të ndryshme elektronike dhe të shkruara në Kosovë dhe më gjerë, në intervistat dhe bisedat pse Arzen Balidemaj është larguar nga Kosova ku është diplomuar në Mjekësi dhe ka shkuar në Gjermani, arsyeja e thjeshtë e përgjegjës së tij ka qenë vetëm specializimi që atje mund ta marrësh, i cili ka dallim shumë të madh me atë në Kosovë. Edhe pse në Kosovë nuk ka punuar, ai pak a shumë e di se si funksionon sistemi. Në Gjermani janë të gjitha të rregulluara. Është katalogu i specializimit që çdo specializant duhet plotësuar gjatë specializimit. Në momentin që plotëson të gjitha operacionet që janë të kërkuara, mund të merret një termin për provim specialistik. Nuk është e thënë se shanca të jepet brenda gjashtë viteve që të bësh të gjitha këto lloje të operacioneve. Kjo periudhë mund të shkojë deri në dhjetë vite e më shumë.
Pas mbarimit të specializimit, dr. Arzen Balidemaj ka vendosur të qëndrojë në Gjermani për kohë të pacaktuar, por jo edhe përgjithmonë. Ka vendosur të qëndrojë atje edhe për disa vite për të marrë më shumë përvojë. Specializimin e ka përfunduar për gjashtë vite dhe ka marrë mjaft përvojë, por siç thotë ai, përvoja në mjekësi merret edhe pas specializimit. Deri sa ka për të mësuar, do të qëndrojë gjithnjë në Gjermani.
Specialisti i ortopedisë dhe traumatologjisë, dr. Arzen Balidemaj, në mes tjerash ka bërë edhe dallimin në mes të Kosovës dhe Gjermanisë në aspektin gjithëpërfshirës të mjekësisë. Këtë argumentuar me të dhënën se prej 10 viteve sa punon në Gjermani në lëmin e ortopedisë dhe traumatologjisë, ka vërejtur se dallimet në mjekësi në mes Kosovës dhe Gjermanisë, për fat të keq janë shumë të mëdha. Shteti gjerman, njihet si shtet i rregullave strikte dhe sigurisht se edhe shëndetësia është mjaft e rregulluar, duke filluar nga kushtet në spitale private apo publike – që nuk dallojnë fare, sigurimet shëndetësore ku çdo person atje është apo jo në marrëdhënie pune ka sigurim shëndetësor. Ka ekspertë nga të gjitha fushat e mjekësisë dhe aparaturë mjekësore ndër më të mirat në Botë. Pra, dallimet janë shumë të mëdha.
Mjeku specialist i ortopedisë dhe traumatologjisë, dr. Arzen Balidemaj, thekson se në Gjermani nuk mund të kryhet një specializim nëse kandidati nuk është i përgatitur mirë. Provimi specialistik kryhet para profesorëve universitar dhe shefave të katedrave të spitaleve më të mëdha në Gjermani, të cilët nuk kanë asnjë mëshirë për kandidatin, nëse ai nuk është i përgatitur.
Klinika e specializuar ortopedike në Republikën e Hessenit në Gjermani, në të cilën punën dr. Arzeni, është ndër klinikat mesatare për nga madhësia. Ka edhe klinika më të mëdha, mirëpo nga cilësia është ndër më të mirat në Gjermani, pasi që 97% e pacientëve që janë trajtuar në klinikën ku punon ai, do të vinin përsëri për trajtim, ose do të rekomandonin dikë tjetër për të ardhur aty për trajtim. Është kjo përqindja më e lartë në Gjermani.
Ortopedi dhe traumatologu, dr. Arzen Balidemaj, me kolegë të profesionit, punon kryesisht në vendosjen e protezave të mëdha – shpatullave, kërdhokullave dhe gjunjëve. Trajton të gjitha lëndimet sportive. Ai në vendin e punës ka funksionin e Oberarzt, që në shqip do të thotë Kryemjek. Ai gjithashtu ka edhe funksionin e operatorit kryesor (Hauptoperateur). Për të qenë operator kryesor në një qendër endoprotetike, duhet vendosur rreth 100 endoproteza të nyejve të mëdha brenda dy viteve, nën mbikëqyrje të një specialisti me shumë përvojë në punë. Dr. Arzeni ka pasur fatin atë ta arrij për një vit. Gjatë licencimit të klinikës ku punon, ka kuptuar se është personi i parë dhe i vetëm në gjithë Republikën e Gjermanisë që ia ka arritur të bëhet operator kryesor brenda një viti dhe të arrijë rekordin në mjekësinë gjermane.
Mjeku specialist dr. Arzen Balidemaj nuk ka nguruar që t’i lavdërojë mjekët në Kosovë duke u shprehur se do të ishte e nevojshme që të shtoheshin më tepër trajnimet në lëmit e caktuara duke thënë se do t’u mundësohej që ata të ambientoheshin edhe me metoda më të reja të sofistikuara që përdoren në Botë.
Dr. Arzen Balidemaj prej që në të ardhmen të kthehet në Kosovë dhe jo i vetëm, për të sjellë përvojën gjermane në mjekësinë kosovare. Ka shumë shokë e kolegë të studimeve në Prishtinë, me të cilët punon bashkë. Janë mjek shumë të suksesshëm dhe kanë pozita të larta në klinikat ku punojnë. Takohet me ta shpesh dhe shkëmbejnë përvojat e veta. Temë e bisedave të tyre shpesh është kthimi në Kosovë si grup dhe kontributi i tyre të jetë i dedikuar popullit, mjekësisë dhe shtetit të Kosovës.
Për rezultate të larta dhe cilësore në aktivitetin e punës profesionale, mjeku Arzen Balidemaj shpeshherë është nderuar dhe shpërblyer me mirënjohje, vlerësime dhe çmime prestigjioze nga klinika ku punon, por edhe nga institucionet e tjera relevante në Hessen e Gjermani.
Për personalitetin e tij të ndritur profesional, kanë shkruar edhe emituar media të ndryshme elektronike dhe të shkruara nga Kosova, Gjermania dhe më gjerë, ndër të cilat përmendim intervistat e dhëna programit të parë të RTK-së dhe të portalit “Telegrafi” në Kosovë.
Mjeku Arzen Balidemaj, kohë pas kohe viziton Kosovës, në veçanti Prishtinën ku ka lindur e diplomuar në Mjekësi, dhe Pejën ku i jetojnë prindërit dhe ku është rritur dhe ka kryer shkollën fillore dhe atë të mesme. Por, pa hezitim dhe me plot gojë themi se Arzeni është vizitues i shpeshtë i Martinajve, i fshatit të lindjes së babait, gjyshit e stërgjyshit, ku dhe kanë shtëpinë familjare.
Arzen Balidemaj është nip dhe dhëndër i Pejës dhe prind i tre fëmijëve.