Pas një sëmundjeje të rëndë, të shtunën, më 22 janar 2022, në moshën 57-vjeçare ndërroi jetë Xhafer Cuka, profesor i edukimit fizik.
Ai u lind më 31 tetor 1965 në Ostros të Madh, Krajë. Shkollën fillore e ka kryer në Ostros, më 1979, ndërsa shkollën e mesme në Ulqin, më 1984. Fakultetin e Kulturës Fizike e ka kryer në Prishtinë, më 2005.
Është profesori i parë i kulturës fizike që jetoi dhe punoi në Krajë. Në Shkollën Fillore “Gjergj Kastrioti-Skënderbeu” në Ostros, filloi punë në vitin shkollor 1994/1995. Gjatë punës shumëvjeçare është dalluar për punën vetëmohuese me nxënës në shkollë dhe jashtë saj. Gjenerata të shumta të nxënësve që ka arsimuar e edukuar Xhaferi, asnjëherë nuk do ta harrojnë profesorin e tyre të dashur. Një punëtor të zellshëm, që me pasion e dashuri ka punuar shumë vjet me brezin e ri, do ta kishin pasë dëshirë ta kishin në gjirin e tyre shumë institucione arsimore, por fati e deshi që Xhaferin ta kishte shkolla në Krajë.
Edhe si veprimtar është dëshmuar në vepër si organizator i pashoq i punës, jo vetëm në shkollë por edhe në rrethinën e gjerë ku ka jetuar, dhe jo vetëm. Ka qenë një ndër sportistët e rrallë të kohës. Profesionalizmi, kolegjialiteti, organizimi i punës në klasë, në sallën e sportit si dhe shumë veti jo vetëm organizative, e kanë karakterizuar këtë njeri të mirë si mësimdhënës në shkollë por edhe si sportist. Është dalluar edhe në jetën shoqërore jashtë shkollës, kryesisht në organizimin e jetës sportive e kulturore në Krajë. Xhaferi ka qenë aktiv edhe në shkrime të ndryshme, sidomos në revistën “Valët”, ku me shkrimet e veta ka pasqyruar arritjet e nxënësve në aktivitete të ndryshme sportive.
Për punën me nxënës dhe arritjet në sport, Xhaferi në monografinë “Shkolla në Krajë” para disa viteve shprehej: “Gjatë punës mësimore më së shumti më ka gëzuar respekti që kishim ndaj njëri-tjetrit në kolektivin e shkollës dhe sukseset e arritura në sport në garat komunale, me theks të veçantë garat në atletikë, ku kemi marrë si shkollë edhe mirënjohje e medalje që gjenden në vitrinat e shkollës sonë. Qysh i vogël kam qenë adhurues i madh i sportit dhe talent, gjë që më ka shtyrë që ta dua këtë profesion. Kjo ka qenë shtysë e madhe që të regjistroj Fakuletin e Kulturës Fizike në Prishtinë. Unë dhe gjenerata ime kemi qenë aktivistë të mëdhenj në organizimin e garave të ndryshme sportive dhe kemi marrë pjesë në shumë turne që janë organizuar jo vetëm në Krajë, por edhe më gjerë. Karriera ime sportive është e gjatë. Sikur t’i cekim të gjitha do duhej të thuhej shumë. Po ceki vetëm disa. Me Ekipin e Futbollit ‘Kraja’ kam qenë i pazëvendësueshëm për shumë vjet në turneun e futbollit që mbahet në Ulqin, ku ekipi im ka qenë njëri nga ekipet më të mira dhe më simpatikët në këtë eveniment sportiv që organizohet në këtë qytet. Më duhet të ceki po ashtu turneun Pro Beach Soccer në rërë, ku ‘Kraja’ zuri vendin e tretë”.
Me ikjen e tij nga kjo jetë, familja mbeti pa më të dashurin, kolegët pa shokun e tyre të punës, nxënësit pa mësimdhënësin e dashur. Xhaferi iku nga kjo botë fizikisht, por në kujtesën e nxënësve, miqve, shokëve, kolegëve, fqinjëve, ai do të mbetet gjithmonë i dashur dhe i respektuar, ngase puna dhe vepra e tij jetësore kanë lënë gjurmë të pashlyeshme. Bujaria, dashuria për njërëzit, morali i lartë, karakteri i fortë, besa dhe burrëria kanë qenë dhe e kanë përcjellur gjatë gjithë jetës.
Lamtumirë nxënësi, miku, shoku dhe kolegu im. Vepra dhe puna jote do të mbetet udhërrëfyes për shumë punëtorë të arsimit. Këtë e ke dëshmuar me punën dhe veprën tënde.
Pusho i qetë Xhafer i dashur! I lehtë të qoftë dheu i vendlindjes! Lavdi veprës dhe punës tënde!
Xhaferi u varros në Ostros më 24 janar 2022.
Kolektivi i Shkollës “Gjergj Kastrioti-Skënderbeu” – Ostros dhe Shoqata e Bjeshkatarëve “Rumia” – Ulqin, anëtar dhe aktivist i së cilës ishte, të premten, më 28 janar 2022, organizuan në Ostros orë përkujtimore në të cilën për jetën dhe veprën e Xhaferit folën Beqir Berjashi, drejtor i shkollës, dhe Mirsad Markashi në emer të SHB “Rumia”. Në emër të familjes së të ndjerit, organizatorët dhe të pranishmit i falënderoi nipi i Xhaferit, Valdet Perashi.
Ali Gjeçbritaj