Tuz – Në prani të familjarëve, të afërmve, miqve, kolegëve, të figurave politike e publike në vend, dhe të një numri të madh të publikut në sallën e QKI “Malësia”, iu dha lamtumira e fundit kryeadministratorit të Komunës së Tuzit, politikanit, aktivistit dhe humanistit, z. Vasel Sinishtaj, i cili disa ditë më parë ndërroi jetë në Shtetet e Bashkuara të Amerikës.
Moderatori i kësaj ore përkujtimore, Nikollë Berishaj tha se sëmundja tradhëtare ndërpreu një jetë përplotë ide dhe plane që prisnin realizimin. Ndërkohë, ai ftoi të pranishmit që me një minutë heshtje t’i jepet lamtumira e fundit të ndjerit, Vasel Sinishtaj.
Berishaj më pas ndau disa kujtime të shoqërimit me Vaselin e ndjerë që nga kohët e hershme të fëmijërisë, nga shkollimi fillor dhe ai mesëm.
“Ai jo vetëm që ishte nxënës i dalluar, por ishte shok, ishte njeri në kuptimin e plotë të fjalës. Gjithmonë i gatshëm për ndihmë, për aksion, për punë”, tha ndër të tjera Berishaj.
Ndërkaq, për veprën e Vasel Sinishtajt dhe për bashkëpunimin shumëvjeçar me të, foli kryetari i parë i Komunës së Tuzit (atëherë komunë urbane) z. Smail Maliq Çunmulaj, i cili tha se Malësia me Vaselin fitoi një ndër juristët e parë të diplomuar në Universitetin e Prishtinës, që punoi nëpër qendrat administrative të shtetit të Malit të Zi.
“Me dinjitet dhe kujdes iu versul punës në sferën profesionale juridike. Popullata e Malësisë kishte nevojë për një personalitet të tillë dhe si asisoi, kurrë nuk përtoi që t’u dalë në ndihmë njerëzve në nevojë, e ata asokohe ishin të shumtë. Këto ditë kur ai ndërroi jetë, duke kërkuar mjekim edhe në spitalet e Shteteve të Bashkuara të Amerikës, dhimbja e madhe e kaploi Malësinë dhe më gjerë”, u shpreh Çunmulaj.
Ai shtoi se jeta dhe vepra e Vaselit ishte e gjithëanshme dhe se Vaseli, me shumë të tjerë nga treva e Malësisë, ishte nga ata të parët kur bëhej fjalë për avancimin e të drejtave të mbarë shqiptarëve në Mal të Zi, e që në vend të parë për të ishte themelimi i pushtetit vendor.
“Duke trokitur në dyer, deri atëherë të mbyllura të udhëheqësisë së këtij shteti, pa prituar dhe pa hezituar, madje edhe në shumë zyra diplomatike në Podgoricë, Bruksel e deri në Shtetet e Bashkura të Amerikës. Të gjitha këto të koordinuara me diasporën tonë, dhe të gjitha me nismën e tij”, tha ndër të tjera Çunmulaj.
Ai potencoi arritjet dhe sukseset e z. Sinishtaj, si aktivist i zellshëm në veprimtarinë parlamentare, si zë dinjitoz i përfaqësimit, si deputet i Kuvendit të Malit të Zi, në ngritjen dhe avancimin e të drejtave të popullatës që ai përfaqësonte.
“Në veçanti gjatë mandatit të tij të parë në Parlamentin e Malit të Zi, kur për fat të keq ndodhi i famëkeqi “Fluturimi i shqiponjës”, ku Vaseli u përkushtua në mënyrë të veçantë, duke u angazhuar pakursim rreth kësaj dhe kërkesava paqësore që të vihej deri tek Komuna e plotë e Malësisë së tij që ai e deshti shumë”, tha Çunmulaj.
Ai vuri në dukje përkushtimin e tij të vazhdueshëm dhe kërkesat e pakompromis për arritjen e statusit të komunës së plotë si dhe përfaqësimin e tij dinjitoz në arritjen e të drejtave të shqiptarëve në Mal të Zi, si dhe humanizimin, zemergjerësinë dhe bujarinë që Sinishtaj kishte në shoqëri.
Kryetari i Komunës së Tuzit, z. Nik Gjeloshaj duke folur për figurën dhe veprimtarinë e Vasel Sinishtajt, e konsideroi atë si njërin ndër drejtuesit kryesor të Komunës së Tuzit, kryeadministratorin e saj Vasel Sinishtaj.
“Të ndahesh nga bashkëpunëtori i ngushtë, është tejet e vështirë, veçanërisht kur bëhet fjalë për një punëtor të zellshem, profesionist, aktivist të pakompromis të së mirës së Malësisë, dhe para së gjithash nga njeriu i parimeve dhe idealeve të shëndosha”, tha ndër të tjera Gjeloshaj.
Ai shtoi në mes tjerash se Sinishtaj ndodhej aty ku kundërshtoheshin politikat asimiluese të pakicave në Mal të Zi, duke qenë, siç tha ai, përherë me të sulmuarin dhe me të shkelurin, por askurrë me sulmuesin dhe shkelësin.
“Fjala e tij shqipe u dëgjua nga foltorja e Parlamentit malazez kur ajo ishte gati e paimagjinueshme. Fjala e tij u dëgjua kur Malësia luftonte për kthimin e komunës së vet. Ishte njëri nga ata që gjenin rrestat e parë të rrugëtimit për fitim të saj. Prandaj, ishte krejtësisht e kuptueshme që falë njohurive dhe profesionalizmit të tij të merrte përgjegjësinë për njërin nga postet më përgjegjëse të komunës, kryeadministratorit të saj”, theksoi Gjeloshaj.
Ai shtoi se Sinishtaj ishte njeriu më me përvojë nga të gjithë të punësuarit në komunën e re, duke mos ngurruar që edhe të tjerët ta pyesnin për gjerat dhe profesionin e tij, dhe jo vetëm.
“Ai i qetë, gjithmonë ishte i gatshëm për ndihmë, me udhëzime dhe punë jurike bënte që edhe situatat në shikim të parë të vështira të zgjidheshin, para së gjithash në të mirë të qytetarëve tonë. Vaseli ka merita të panumërta që do të kërkonin kohë vetëm për t’i numëruar. Por idetë dhe planet e tij ishin të shumta, për këtë arsye edhe e ndjejmë më tepër mungesën e tij”, tha Gjeloshaj duke premtuar se ato ide dhe biseda që kishin do t’i vazhdojë dhe do të përpiqet që t’i realizojë.
Funerali për të ndjerin Vasel Sinishtaj u bë më 25 tetor 2022, në Qendrën Funerale “Malësia”, ndërsa po të njëjtën ditë u bë varrimi i tij në varrezat famljare.
t. u.