Guci – Nënkryetari i Qeverisë së Malit të Zi për Politikë Ekonomike, Nik Gjeloshaj dhe ministri i Administratës Publike, Marash Dukaj, të premten e kaluar më 26 korrik 2024, qëndruan në vizitë pune Komunës së Gucisë. Ata në kabinetin e vet i priti dhe u uroi mirëseardhje kryetari i Komunës, Sanell Balliq me bashkëpunëtorët e vet.
Kryetari Balliq, në fjalimin e vet të rastit, mysafirët e lartë të Qeverisë së Malit të Zi, në mënyrë analitike dhe koncize i njoftoi me projektet dhe planet aktuale zhvillimore të Komunës, ndër të cilat si prioritare (parësore) përmendi ato të infrastrukturës rrugore: rrugët lokale Guci-Vuthaj, Guci-Grebajë dhe aksin e rrugës rajonale Guci-Plavë nëpër Krushevë e Vishnjevë. Ai në vazhdim theksoi se kjo vizitë është e rëndësishme për Komunën e Gucisë mu për shkak të shkëmbimit të përvojave, këshillave dhe rekomandimeve që duhet të zbatohen në nivelin lokal, duke shprehur besimin se në të ardhmen Ministria e Administratës Publike do të jetë partner i besueshëm dhe i përgjegjshëm në kuadrin e përmirësimit dhe avancimit të punës së mëtejme të qeverisjes lokale dhe të shërbimeve efikase të qytetarëve.
Nënkryetari Gjeloshaj, në bisedën me nikoqirët gucianë, theksoi rëndësinë që Komuna e Gucisë ka për Malin e Zi, me theks të veçantë në potencialet e mëdha për zhvillimin e turizmit. Ai në vazhdim tha se përmirësimi i infrastrukturës rrugore (transportit), padyshim është stimul i rëndësishëm për valorizimin e potencialeve turistike dhe përmirësimin e cilësisë së jetës së të gjithë banorëve të kësaj treve.
Ndërkaq, ministri i Administratës Publike, Marash Dukaj, në fjalën përshëndetëse të rastit shpreh kënaqësinë për vizitën e bërë Komunës së Gucisë duke konfirmuar se Ministria e Administratës Publike do të ofrojë mbështetje dhe përkrahje të gjithanshme në realizimin e shërbimeve efikase dhe me kohë të qytetarëve, me qëllim të krijimit të një administrate publike më efikase.
“Ministria e Administratës Publike është duke punuar në mënyrë aktive në reformën e përgjithshme të sistemit të vetëqeverisjes lokale. Jemi në përgatitje të Ligjit të ri në këtë drejtim, i cili ka për qëllim decentralizimin dhe garanton plotësisht funksionimin më efikas të sistemit të vetëqeverisjes lokale. Përveç decentralizimit, fokusi është i përqendruar edhe në përmirësimin e bashkëpunimit ndërkomunal dhe procesin e integrimeve evropiane, i cili është veçanërisht për Komunën e Gucisë”, është shprehur me admirim ministri Dukaj.
Në punën e takimit dypalësh, bashkëbiseduesit kanë zhvilluar biseda e diskutime analitike e koncize edhe për tema të tjera të shumta që kanë të bëjnë me funksionimin e Komunës, për projektet aktuale, planet e ardhshme me fokus në ofrimin më efikas të shërbimeve për qytetarët dhe bashkëpunimin e mundshëm, duke u theksuar se bashkëpunimi më intensiv ndërkomunal mund të kontribuojë në ngritjen e kapaciteteve të personelit, por edhe në realizimin e projekteve të rëndësishme në fushën e bujqësisë, turizmit dhe mjedisit jetësor.
Në fund të kësaj informate theksojmë se nënkryetari i Qeverisë së Malit të Zi për Politikë Ekonomike, Nik Gjeloshaj, dhe ministri i Administratës Publike, Marash Dukaj, po të premten më 26 korrik 2024, morën pjesë në seancën solemne të Kuvendit të Komunës së Plavës me rastin e shënimit të Ditës së kësaj komune.
Shaban Hasangjekaj