Nga ana e MONSTAT-it kanë njoftuar se deri tash janë shpallur dy tenderë për blerjen e softuerit, por ata kanë dështuar, e së shpejti do të shpallet tenderi i tretë dhe shpresohet se do të realizohet me sukses dhe do të mundësojë shpalljen e të dhënave nga regjistrimi i popullsisë. Por, deri atëherë do të vazhdojnë komentet negative në lidhje me këtë çështje, që krijon mundësi për spekulime në opinionin e gjerë.
Të dhënat e përgjithshme të publikuara
Të dhënat paraprake mbi regjistrimin e popullsisë, familjeve dhe të banesave në Mal të Zi që është mbajtur nga 1-28 dhjetor 2023 nga ana e MONSTAT-it opinionit iu prezantuan më 25 janar, ku numri i përgjithshëm i popullsisë është 633.158 banorë apo për 2.1% më tepër së në vitin 2011 (620.029 banorë).
Sipas të dhënave të regjistrimit të popullsisë, në aspektin regjional, del se regjioni Verior në Mal të Zi, është i përfshirë nga dukuria e shpopullimit, sepse për pesëdhjetë vjet 1971-2023, numri i banorëve ka rënë për 70.617 (30.66%) nga 230.309 (1971) në 159.662 (2023).
Nga ana tjetër regjioni Qendror ka pasur rritje për 106.944 banorë (34.54%) nga 202.612 (1971) në 309556 (2023). Po ashtu rritje ka pasur edhe regjioni Jugor për 65.277 banorë (39.81%) nga 96.683 (1971) në 163.960 (2023).
Dukuria e tillë e shpopullimit të popullsisë, dëshmon pabarazinë e zhvillimit ekonomik në aspektin regjional, e cila në sajë të parashikimeve do të vazhdojë edhe në të ardhmen, ku me atraktiv do të jetë regjioni Qendror e ai Jugor.
Shpopullimi, dukuri shqetësuese
Sipas të dhënave të publikuara në vitin 2011 në Mal të Zi ishin 43 vendbanime pa banorë (3.3%) ndërsa tash ky numër është rritur në 74 (5.1%) e numrit të përgjithshëm në Mal të Zi.
Nga ana tjetër është rritur dukshëm edhe numri i vendbanimeve nga 10 banorë e më pak që janë 304 (20.8%) ndërsa në vitin 2011 ishin 120 apo 9.2%. Një e dhënë e tillë dëshmon
se për disa vite në vijim një e katërta e vendbanimeve do të jenë pa banorë, që është dëshmi e migrimit të popullsisë, përkatësisht e shpopullimit të vendbanimeve!
Spekulime me strukturën e popullsisë
Në mungesë të publikimit zyrtar të strukturës së popullsisë nga individë të ndryshëm janë prezantuar informata sa i përket strukturës kombëtare të popullsisë. Një çështje e tillë ka të bëjë kryesisht në lidhje me numrin e të deklaruarve në aspektin kombëtar si malazezë dhe serbë, sepse në sajë të raporteve politike viteve të fundit në Mal të Zi, kjo çështje është politizuar shumë.
Ndërsa, nëse analizojmë të dhënat nga regjistrimet e kaluara te popullsisë (1948-2011) ka fakte të mjaftueshme se janë bërë falsifikime numerike në këtë drejtim, e atë kryesisht në favor të malazezëve e në dëm të popujve tjerë, që ishte në kundërshtim me realitetin në këtë mjedis multinacional. Në këtë aspekt falsifikime janë bërë edhe ndaj shqiptarëve që dëshmohet nëse analizohen të dhënat sipas vendbanimeve të banuara me popullsi shqiptare në viset e tyre, si popullsi autoktone në këtë mjedis, që paraqet çështje për hulumtim të veçantë.
Por, pasi ndërkohë mungojnë të dhënat zyrtare nga regjistrimi i popullsisë, e sidomos në lidhje me veçoritë etnike e kulturologjike, individë të ndryshëm janë paraqitur me prezantim të të dhënave të cilat nuk janë si rezultat i të dhënave të përpunuara nga regjistrimi i popullsisë, andaj si të tilla nuk kemi të bëjmë me informata të sakta, por janë parashikime personale apo të grupeve të ndryshme dhe si të tilla nuk janë zyrtare, por janë lajthitje për opinionin e gjerë.
Pikërisht ne lidhje me këtë çështje nga MONSTAT-i kanë informuar se të dhënat e mbledhura sipas pyetësorëve ka qenë e nevojshme të vendosen në sistem, për të filluar procesi i kontrollit dhe përpunimi i të dhënave. Vendosja e të dhënave ka filluar në muajin shkurt dhe ka zgjatur deri në fund të prillit. Krahas fazës së vendosjes së të dhënave është edhe kontrollimi i të dhënave, ku kjo fazë do të zgjasë deri në publikimin e të dhënave definitive nga regjistrimi i popullsisë.
Duke marrë parasysh se nga janari e deri tash u është krijuar një vakum kohor individëve të ndryshëm, iu është dhënë mundësia për paraqitje të të dhënave të ndryshme në lidhje me strukturën kombëtare e gjuhësore të popullsisë, që me të drejtë i quajmë spekulime, sepse për të dhënat zyrtare kompetent është vetëm MONSTAT-i e askush tjetër.
Në pritje të softuerit
Kemi të bëjmë me softuerin i cili ka rolin e kontrollit të dhënave të grumbulluara gjatë regjistrimit të popullsisë, familjeve dhe të banesave, i cili deri me tash nga ana e MONSTAT-it është shpallur dy herë, por ka dështuar andaj së shpejti do të shpallet tenderi i ri i treti më radhë, duke shpresuar që përfundimisht të zgjidhet kjo çështje teknike, qe është e nevojshme për publikimin e të dhënave zyrtare të regjistrimit të popullsisë.
Në sajë të ligjit MONSTAT-i e ka paraparë si obligim që qytetarëve t´iu ofrojë mundësinë për të vërtetuar të dhënat e tyre, në lidhje me karakteristikat etnike e kulturologjike të mbledhura në procesin e regjistrimit përmes softuerit. Kemi të bëjmë me një procedurë qe nuk mund të vlerësohet vetëm si teknike, sepse ka të bëjë me seriozitetin dhe saktësinë e të dhënave të prezantuara në regjistrimin e popullsisë. Kemi të bëjmë me mundësinë teknike të çdo qytetari për të lexuar e parë personalisht të dhënat e regjistruara në fletën e regjistrimit të popullsisë, çështje e cila eliminon dilemat për spekulime të ndryshme, që është dukuri e shoqërive e vendeve të pakonsoliduara, ku bënë pjesë edhe Mali i Zi.
Përfundimisht cekim se sipas Ligjit për Regjistrim, publikimi i rezultateve nga regjistrimi i popullsisë, familjeve dhe banesave të vitit 2023, është në kompetencë të MONSTAT-it, andaj çdo informacion tjetër është spekulim dhe pa vlerë për opinion e gjerë.