Guci – Qendra Kombëtare e Kinematografisë së Shqipërisë në bashkëpunim me Qendrën e Filmit të Malit të Zi, të mërkurën mbrëma, më 7 qershor 2023, në sallën e madhe të Qendrës për kulturë në Guci shfaqi filmin komedi me titull “Dashuri dhe turbulenca” të regjisorit Dionis Papadhimitri, në të cilin rolet kryesore i luajnë aktorët: Gentian Zenelaj, Rudina Dembacaj, Amos Muji Zaharia, Alesia Xhemalaj, Sara Kolami, Olimpia Smajlaj dhe Behar Mera.
Komedinë në fjalë, gratis e shikuan një numër i konsiderueshëm adhuruesish shqiptarë të artit filmik, por edhe të komunitetit boshnjak nga Gucia me rrethinë, por edhe ca nga Plava.
Qendra e Filmit të Malit të Zi në bashkëpunim me Qendrën Kombëtare të Kinematografisë së Shqipërisë është duke organizuar dhe realizuar programin e titulluar “Filmi si mjet për dialog ndërkulturor”.
Programi i palëve në fjalë, në mes tjerash ka për qëllim organizimin e realizimit të ditëve të filmit malazez në Shqipëri, po ashtu edhe të ditëve të filmit shqiptar në Mal të Zi.
Programi i cili ka filluar të realizohet më 27 mars 2023 në Tiranë, do të realizohet edhe në Vlorë e Gjirokastër të Shqipërisë, si dhe u realizua në qendrat e Malit të Zi prej 5-8 qershor, konkretisht në Podgoricë më 5 qershor, në Tuz më 6 qershor, në Guci më 7 qershor dhe në Ulqin më 8 qershor.
Shaban Hasangjekaj